Cambodia's daily events

ប្រមុខរដ្ឋាភិបាលកម្ពុជា លោក ហ៊ុន សែន បានឆ្លើយតបទៅនឹងបញ្ហាEBA ដែលជាប្រព័ន្ធអនុគ្រោះរបស់សហភាពអឺរ៉ុប ចំពោះបណ្តាទំនិញនាំចេញពីកម្ពុជា ជាពិសេសវិស័យវាយនភណ្ឌកាត់ដេរ ថាមិនបានប៉ះពាល់ដល់សេដ្ឋកិច្ចកម្ពុជា បើទោះបីជាការនាំចេញទៅកាន់ទីផ្សារអឺរ៉ុបត្រូវបង់ពន្ធ បន្ទាប់ពីកម្ពុជាបានបាត់បង់ប្រព័ន្ធអនុគ្រោះមួយនេះ ២០%។ រយៈពេលបីឆ្នាំមកនេះ លោក ហ៊ុន សែន បានអះអាងថា ការបាត់បង់ផ្នែកខ្លះនៃប្រព័ន្ធអនុគ្រោះពន្ធ EBA ជាការពង្រឹងភាពធន់របស់កម្ពុជាចាប់ពីពេលនេះតទៅ ខណៈដែលកម្ពុជាក៏កំពុងតៀមចាកចេញពីប្រទេសអភិវឌ្ឍន៍តិចតួច ដែលអាចនឹងបាត់បង់EBAទាំងស្រុងផងដែរ។​

អង្គការ​សម្ព័ន្ធ​យុវជន​ដើម្បី​ឯកភាព​ និង​អភិវឌ្ឍន៍ ​បាន​រៀបចំ​ការ​ជជែក​ពិភាក្សា​ពី​សំណាក់​បណ្តា​យុវជន​គណបក្ស​នយោបាយ​ និង​អង្គការ​សង្គម​ស៊ីវិល​ អំពី​គោល​នយោបាយ​សាធារណៈ​របស់​រដ្ឋាភិបាល។​ ក្រុម​យុវជន​ទាំង​ពី​គណបក្ស​កាន់​អំណាច​ និង​បក្ស​ប្រឆាំង​ បាន​យល់​ស្រប​គ្នា ​ដោយ​ចង់​ឃើញ​រដ្ឋាភិបាល​ធ្វើ​កំណែ​ទម្រង់​គោល​នយោបាយ​សាធារណៈ​ចំនួន​១២​ចំណុច។​ តើ​គោល​នយោបាយ​អ្វីខ្លះ​ដែល​យុវជន​ពី​បក្ស​នយោបាយ​ចង់​ឃើញ​រដ្ឋាភិបាល​ធ្វើ​កំណែ​ទម្រង់?​

លោក សម រង្ស៊ី ប្រធានស្តីទីអតីតគណបក្សសង្គ្រោះជាតិ និងសហការី បានធ្វើដំណើរទៅដល់ប្រទេសម៉ាឡេស៊ី កាលពីថ្ងៃអង្គារ នៅក្នុងគោលបំណងមួយដែលជាការប៉ុនប៉ងចូលទៅក្នុងប្រទេសកម្ពុជាសាជាថ្មី ដោយកាន់លិខិតឆ្លងដែនបារាំង។ ក៏ប៉ុន្តែ ប្រមុខរដ្ឋាភិបាលកម្ពុជាលោក ហ៊ុន សែន បានថ្លែងនៅថ្ងៃពុធថា ក្រុមលោក សម រង្ស៊ី ត្រូវបានអាជ្ញាធរម៉ាឡេស៊ីផ្អាកការជួបជុំ និងបានចាកចេញពីប្រទេសម៉ាឡេស៊ី។ ជុំវិញវត្តមានរបស់លោក សម រង្ស៊ី នៅប្រទេសម៉ាឡេស៊ីពេលនេះ តើវាអាចប៉ះពាល់ដល់ទំនាក់ទំនងរវាងកម្ពុជា និងម៉ាឡេស៊ីដែរឬយ៉ាងណា ដោយសារកន្លងមកលោក អាន់វ៉ា អ៊ីប្រាហ៊ីម នាយករដ្ឋមន្ត្រីថ្មីរបស់ម៉ាឡេស៊ី បានសន្យាជាមួយលោក ហ៊ុន សែន ថាមិនអនុញ្ញាតឲ្យក្រុមលោកសម រង្ស៊ី ចូលដឹកដីម៉ាឡេស៊ីទេ។

អង្គការការពារសិទ្ធិមនុស្សលីកាដូកាលពីថ្ងៃទី ០១ ខែមិថុនាម្សិលមិញស្របពេលទិវាកុមារអន្តរជាតិខួបទី៧៤ បានចេញផ្សាយរបាយការណ៍មួយ ដោយបានរកឃើញថាចំនួន​អនីតិជន​ ​ដែល​កំពុង​ជាប់ឃុំ​នៅ​ក្នុង​ពន្ធ​នាគា​រទាំង​១​៩​កន្លែង​ ​ដែល​អង្គការ​​លី​កា​ដូបាន​ឃ្លាំមើល​ ​មានការ​កើន​ឡើងជា​ង​ ​៣​០​% ​ដែល​ជា​ចំនួន​មួយលើស​ពី​​ឆ្នាំមុន​។​ ​នេះ​បើ​យោងទៅតាម​ព័ត៌មាន ​ដែល​អង្គការលីកាដូទទួល​បាន​ពី​មន្ត្រី​រដ្ឋបាល​ពន្ធ​នាគា​រ​ជាច្រើន​។ ជាមួយគ្នានេះ អង្គការលីកាដូរក៏បាន​ទាមទារ​ឱ្យ​បញ្ឈប់​ការ​ឃុំ​ខ្លួន​ ​សម្រាប់​ករណី​មួយ​ចំនួន​ដែល​មិន​ចាំបាច់​មក​លើ​កុមារ​ ​ដែល​នេះ​ជា​រំលោភ​សិទ្ធិ​អនីតិជន​ ​និង​អត្ថប្រយោជន៍​របស់​កុមារ​យ៉ាង​ខ្លាំង​ ដោយអង្គការទទូចឲ្យអាជ្ញាធរ​អនុវត្ត​វិធានការ​ដាក់​ឱ្យ​ក្រៅ​ឃុំ​បណ្តោះអាសន្ន​លើ​គ្រប់​អនីតិជន​ ​ស្ត្រី​ ​ក្មេង​ស្រីមានផ្ទៃពោះ​ ​និង​ ​ម្តាយ​ដែល​មានកូន​តូច​ ​និង​អនុវត្ត​ជម្រើស​ទោស​ដទៃទៀត​ជំនួស​ឱ្យ​ការ​ឃុំឃាំង​​ ក្នុងនោះក៏រាប់បញ្ចូលផងដែរ​ចំពោះ​អ្នក​ដែល​ប្រព្រឹត្ត​បទល្មើស​គ្រឿងញៀន​តូចតាច​។​

បក្សភ្លើងទៀនគ្រោងប្រមូលផ្តុំសមាជិក-សមាជិកា និងអ្នកគាំទ្រប្រមាណ១ម៉ឺននាក់នៅទីលានប្រជាធិបតេយ្យនាពេលខាងមុខ នៅពេលដែលសាលាក្រុងភ្នំពេញអនុញ្ញាតឱ្យប្រមូលផ្តុំសម្តែងមតិដោយសន្តិវិធី។ កម្មវត្ថុនៃការសម្តែងមតិរបស់បក្សភ្លើងទៀន គឺដើម្បីទាមទារចូលរួមការបោះឆ្នោតជ្រើសតាំងតំណាងរាស្ត្រនីតិកាលទី៧ ឆ្នាំ២០២៣ ក្រោយគណៈកម្មាធិការជាតិរៀបចំការបោះឆ្នោត និងក្រុមប្រឹក្សាធម្មនុញ្ញសម្រេចបដិសេធការចុះឈ្មោះបក្សភ្លើងទៀនឱ្យចូលរួមបោះឆ្នោត។ ជុំវិញគម្រោងប្រមូលផ្តុំគ្នាសម្តែងមតិនេះ អ្នកវិភាគយល់ថា ជាការខកចិត្តទៅនឹងសេចក្តីសម្រេចរបស់គជប និងជាការបង្ហាញការប្រឆាំងទៅនឹងអ្វីដែលលោកនាយករដ្ឋមន្ត្រីចោទប្រកាន់មកលើបក្សភ្លើងទៀនថា មានគំនិតទុច្ចរិត។ តែយ៉ាងណា អ្នកវិភាគព្រួយបារម្ភថា បក្សភ្លើងទៀនអាចប្រឈមការចោទប្រកាន់ជុំវិញការបង្កចលាចលបន្ថែមមុនបោះឆ្នោត ប្រសិនបើការសម្តែងមតិធ្វើខុសពីទម្រង់ច្បាប់។

ជាទូទៅថវិកាជាតិសម្រាប់ផ្គត់ផ្គង់ដល់រដ្ឋបាលថ្នាក់ក្រោមជាតិបច្ចុប្បន្ននេះ ត្រូវគេមើលឃើញថានៅតិចតួចនៅឡើយ គឺប្រមាណជា១៣%។ តាមរយៈថវិកាជាតិជាង១០%នេះ អង្គការសង្គមស៊ីវិលមួយចំនួនយល់ឃើញថាមិនអាចឆ្លើយតបទៅនឹងតម្រូវការបច្ចុប្បន្នបានទេ។ តាមអង្គការសង្គមស៊ីវិល យ៉ាងហោចណាស់ថវិកាប្រមាណពី២០ ទៅ៣០% នៃថវិកាជាតិប្រចាំឆ្នាំទើប អាចជួយទ្រទ្រង់ដល់តម្រូវការចាំបាច់របស់ថ្នាក់មូលដ្ឋាន។

ការ​តស៊ូ​ទាមទារ​ឲ្យ​ចុះ​បញ្ជីរ​បស់​គណបក្ស​ភ្លើងទៀន​ បាន​ដើរ​មក​ដល់​ផ្លូវ​អស់​ជម្រើស​នៅ​ក្រោយ​ពេល​ដែល​ក្រុម​ប្រឹក្សា​ធម្មនុញ្ញ​បាន​សម្រេច​តម្កល់​ការ​បដិសេធ​របស់​គណៈ​កម្មាធិការ​ជាតិ​រៀបចំ​ការ​បោះឆ្នោត។​ ការណ៍​នេះ ​អ្នក​តាមដាន​បញ្ហា​ប្រជាធិបតេយ្យ​នៅ​កម្ពុជា​ យល់​ថា​ ស្ថានភាព​របស់​អ្នក​ប្រជាធិបតេយ្យ​បាន​ដើរ​មក​ដល់​ចំណុច​ទាល់​ច្រក​ អស់​ផ្លូវ​នឹង​បន្ត។​ ក៏​ប៉ុន្តែ​អ្នក​តាម​ដាន​ខ្លះ ​យល់​ថា ​នេះ​មិន​មែន​ជា​បរាជ័យ​ឡើយ។​ តើ​អ្នក​ប្រជាធិបតេយ្យ​ពិត​ជា​អស់​ផ្លូវ​ ក្រោយ​គណបក្ស​ភ្លើងទៀន​មិន​អាច​ចូល​រួម​ការ​បោះឆ្នោត?​

គណបក្ស​ភ្លើងទៀន​ ដែល​ជា​គណបក្ស​ប្រឆាំង​ដ៏​ធំ​មួយ​នៅ​កម្ពុជា​ មិន​បាន​ចូលរួម​ការ​បោះឆ្នោត​ជ្រើសតាំង​តំណាង​រាស្រ្ត ​នីតិកាល​ទី៧​ ឆ្នាំ​២០២៣​នេះ​ឡើយ​ ដោយសារ​តែ​គណៈ​កម្មាធិការ​ជាតិ​រៀបចំ​ការ​បោះឆ្នោត​ (គ.ជ.ប)​ បដិសេធ​មិន​ទទួល​យក​​ការ​ចុះ​បញ្ជី ​ខណៈ​ក្រុម​ប្រឹក្សាធម្មនុញ្ញ​វិញ​ បាន​រក្សា​ការ​សម្រេច​របស់​ គ.ជ.ប​ ទុក​ជា​បានការ​ដោយ​បិទ​ផ្លូវ​តវ៉ា។​ ការ​សម្រេច​បែប​នេះ ​បាន​ធ្វើ​ឲ្យ​សហគមន៍​អន្តរជាតិ​ចេញ​មក​ប្រតិកម្ម​ជា​បន្ត​បន្ទាប់​ ជា​ហេតុ​ធ្វើ​ឲ្យ​លោក​នាយក​រដ្ឋមន្រ្តី​ ហ៊ុន សែន​ ថា​បញ្ហា​នេះ​ ជា​ល្បិចកល​ថ្នាក់​ដឹក​នាំ​ណា​ម្នាក់​របស់​គណបក្ស​ភ្លើងទៀន​ ដែល​មិន​ចង់​ឲ្យ​គណបក្ស​នេះ​ចូលរួម​ការ​បោះឆ្នោត​ ក្នុង​ចេតនា​ដើម្បី​ឲ្យ​សហគមន៍​អន្តរជាតិ​ដាក់​សម្ពាធ​មក​លើ​កម្ពុជា។​

ក្រុមប្រឹក្សាធម្មនុញ្ញកាលពីថ្ងៃទី២៥ ខែឧសភាម្សិលមិញ បានសម្រេចមិនអនុញ្ញាតឲ្យគណបក្សភ្លើងទៀន ដែលជាគណបក្សប្រឆាំងដ៏ស្រួចស្រាល់នឹងគណបក្សកាន់អំណាចបានចូលរួមនៅក្នុងការបោះឆ្នោតជ្រើសតាំងតំណាងរាស្ត្រនីតិកាលទី៧ ដែលនឹងប្រព្រឹត្តទៅនៅថ្ងៃទី២៣ ខែកក្កដា ឆ្នាំ២០២៣នេះ។ ការសម្រេចដោយបិទផ្លូវតវ៉ានេះ ធ្វើឲ្យគណបក្សភ្លើងទៀនខកខានការចូលរួមបោះឆ្នោតដ៏សំខាន់។ ជាការខកខានដែលត្រូវបានចោទសួរថា តើវាជាសេណារីយ៉ូដែលបានគ្រោងទុកឬយ៉ាងណា?

លោកនាយករដ្ឋមន្ត្រី ហ៊ុន សែន នៅក្នុងឱកាសនៃពិធីសម្ពោធដាក់ឲ្យប្រើប្រាស់សកលវិទ្យាល័យភូមិន្ទវិចិត្រសិល្បៈកាលពីថ្ងៃពុធ បានថ្លែងរំលឹកឲ្យក្រសួងវប្បធម៌ និងផ្នែកពាក់ព័ន្ធមានការប្រុងប្រយ័ត្នចំពោះការទទួលយកវប្បធម៌គេដោយស្ម័គ្រចិត្ត។ ដោយលើកឡើងពីការបន្តមរតកដូនតា ដូចជាក្បួនខ្នាតបដិមា និងរូបចំលាក់ផ្សេងៗ លោកនាយករដ្ឋមន្ត្រី ក៏បានប្រកាសផងដែរពីការបណ្តុះបណ្តាលដល់យុវជនចំនួន១,៥លាននាក់ សម្រាប់រយៈពេល៥ឆ្នាំទៅមុខ ក្នុងនោះការបណ្តុះបណ្តាលជំនាញមរតកដូនតាពី២ ទៅ៤% ត្រូវបានប្រគល់ទៅឲ្យក្រសួងវប្បធម៌ទទួលខុសត្រូវ ដោយសហការជាមួយក្រសួងការងារ។

ការបោះឆ្នោតជ្រើសរើសសមាជិករដ្ឋសភាថ្មីនៅប្រទេសថៃកាលពីចុងសប្តាហ៍មុនបានបញ្ចប់ទៅហើយ ហើយក៏គេអាចដឹងបានជាបណ្តោះអាសន្នដែរថា គណបក្ស Move Forward ឬ​ហៅ​ជា​ភាសា​ថៃថា កាវក្លៃ និង​គណបក្សភឿថៃរបស់កូនស្រីអតីតនាយករដ្ឋមន្ត្រីថាក់ស៊ី ស៊ីណាវ៉ាត្រា ​ទទួល​បាន​សំឡេង​នាំ​មុខ​គេ​ក្នុង​លំដាប់​ទី១ និង​ទី២។ រីឯគណបក្សដែលដឹកនាំដោយលោកនាយករដ្ឋមន្ត្រី ប្រាយុទ្ធ ចាន់អូចា វិញទទួលបានការគាំទ្រតិចតួច។ តើការបោះឆ្នោតនៅប្រទេសថៃបានឆ្លុះបញ្ចាំងយ៉ាងណាខ្លះសម្រាប់កម្ពុជា ដែលគ្រោងនឹងបោះឆ្នោតជ្រើសតំាងតំណាងរាស្ត្រនីតិកាលទី៧ នៅថ្ងៃទី២៣ ខែកក្កដា ខាងមុខ?

មន្ត្រី​ជាន់​ខ្ពស់​ក្រសួង​មហាផ្ទៃ ​លោក​ ខៀវ សុភ័គ ​បាន​អះអាង​ថា​ ការ​ចាប់​ខ្លួន​លោក​ ថេង សាវឿន​ និង​សហការី​២រូប​ផ្សេង​ទៀត​ ដោយ​សង្ស័យ​ថា​ ជាប់​ទាក់ទិន​នឹង​ផែនការ​ធ្វើ​បដិវត្តន៍​កសិករ​ ក្រោយ​សមត្ថកិច្ច​រក​ឃើញ​ឯកសារ​មួយ​ចំនួន​ក្នុង​កុំព្យូទ័រ​របស់​លោក​បាន​បង្ហាញ​ពី​ខ្លឹមសារ​បដិវត្តន៍​ និង​ផ្អែក​តាម​ការ​សារភាព​អំឡុង​ពេល​នីតិវិធី​សាកសួរ​ដោយ​សមត្ថកិច្ច​នៃ​ស្នងការ​ខេត្ត​រតនៈគិរី។​ ក៏​ប៉ុន្តែ​អ្នក​វិភាគ​ចាត់​ទុក​ថា​ ពាក្យ​បដិវត្តន៍​នេះ​មិនមែន​ស្ថិត​ក្នុង​ន័យ​បង្ក​ភាព​វឹកវរ​ដល់​សង្គម​ជាតិ។​ ប៉ុន្តែ​ជា​ការ​ផ្លាស់​ប្តូរ​ និង​កែ​ប្រែ​ពី​ផល​អវិជ្ជមាន​មក​ជា​វិជ្ជមាន​វិញ។​ ទន្ទឹម​នឹង​នេះ ​ករណី​លោក​ ថេង សាវឿន​ អ្នក​វិភាគ​យល់​ថា​ សកម្មជន​រូប​នេះ​មិន​មាន​អំណាច​ ឬ​ឥទ្ធិពល​ឯណា​ធ្វើ​បដិវត្តន៍​ទម្លាក់​រដ្ឋាភិបាល​អ្វី​ឡើយ។​

ព្រឹត្តិការណ៍​ប្រកួត​កីឡា​អាស៊ីអាគ្នេយ៍​លើក​ទី៣២​នៅ​កម្ពុជា​បាន​បិទ​បញ្ចប់​ដោយ​ជោគជ័យ​ ក្រោយ​អត្តពលិក​មក​ពី​បណ្តា​ប្រទេស​ទាំង​១១​បាន​ប្រកួត​ប្រជែង​គ្នា​យ៉ាង​ស្វិតស្វាញ​អស់​រយៈ​ពេល​ជិត​កន្លះ​ខែ។ ​គេ​សង្កេត​ឃើញ​ថា​ ក្នុង​នាម​ជា​ម្ចាស់​ផ្ទះ​ ពលរដ្ឋ​ខ្មែរ​ភាគ​ច្រើន​បាន​ចូល​រួម​ទស្សនា​ការ​ប្រកួត​ស្ទើ​គ្រប់​ប្រភេទ​កីឡា ​និង​វិញ្ញាសា​ហើយ​ថែម​ទាំង​យល់​ដឹង​ពី​ប្រភេទ​កីឡា​នីមួយៗ​ថែម​ទៀត​ ពិសេស​កីឡា​លំដាប់​អូឡាំពិក។​ តែ​យ៉ាងណា​ អ្នក​ស្រាវជ្រាវ​ និង​អ្នក​វិភាគ​យល់​ថា​ ការ​ចាប់​អារម្មណ៍​របស់​ពលរដ្ឋ​លើ​ប្រភេទ​កីឡា​នីមួយៗ​គឺ​ជា​ផ្នែក​មួយ​ក្នុង​ការ​លើក​ស្ទួយ​វិស័យ​កីឡា​ក្នុង​ប្រទេស។​ ប៉ុន្តែ​ដើម្បី​ឱ្យ​វិស័យ​កីឡា​នៅ​កម្ពុជា​រីក​ចម្រើន​ លុះត្រាតែ​ ពលរដ្ឋ​សកម្ម​លើ​ការ​ចូលរួម​គ្រប់​សកម្មភាព​ជា​មួយ​កីឡាករ​ ហើយ​មិន​ត្រូវ​គាំទ្រ​តែ​មួយ​ឆាវ។​

បណ្តាទូតប្រទេសប្រជាធិបតេយ្យ និងអង្គការសង្គមស៊ីវិលអន្តរជាតិ ដែលធ្វើការលើផ្នែកប្រជាធិប​​តេយ្យ និងសិទ្ធិមនុស្ស បានចេញមកប្រតិកម្មជាបន្តបន្ទាប់ ក្រោយពីគណៈកម្មាធិការជាតិរៀបចំការបោះឆ្នោត (គជប) បានបដិសេធមិនទទួលយកការចុះបញ្ជីរបស់គណបក្សភ្លើងទៀន ជាគណបក្សប្រឆាំងមួយដែលពួកគេគិតថា អាចចូល​​រួមប្រកួតប្រជែងការបោះឆ្នោតជ្រើសតាំងតំណាងរាស្រ្តនីតិកាលទី៧ ឆ្នាំ២០២៣ ជាមួយគណបក្ស​​កាន់​អំណាច។ ប៉ុន្តែយ៉ាងណាគណបក្សឆាំងមួយនេះ នៅមានឱកាសមួយទៀតដែលបញ្ជាក់ថាអាចចូល​រួមការបោះឆ្នោតបានឬមិនបាន នោះគឺក្រុមប្រឹក្សាធម្មនុញ្ញ។

ការប្រកួតកីឡាអាស៊ីអាគ្នេយ៍(ស៊ីហ្គេម)លើកទី៣២ ឆ្នាំ២០២៣ ដែលកម្ពុជាធ្វើជាម្ចាស់ផ្ទះ បានបិទបញ្ចប់ហើយនៅថ្ងៃពុធម្សិលមិញ បន្ទាប់ពីបានដំណើរការអស់រយៈពេលកន្លះខែ។ ការធ្វើជាម្ចាស់ផ្ទះរបស់កម្ពុជាជាលើកដំបូងសម្រាប់កីឡាតំបន់នេះ ត្រូវគេមើលឃើញថាបានទទួលនូវផ្លែផ្កាជាវិជ្ជមានច្រើន ជាងចំណុចខ្វះខាត ដោយកម្ពុជាបានធ្វើឲ្យប្រសើរឡើងនូវវិស័យកីឡារបស់ខ្លួន និងគោរពទៅតាមបទដ្ឋានរៀបចំជាអន្តរជាតិបានល្អពីដើមរហូតដល់ទីបញ្ចប់។

គណបក្សភ្លើងទៀន ដែលគេចាត់ទុកថាជាគណបក្សប្រឆាំងស្រួចស្រាល់ជាងគេនៅក្នុងការបោះឆ្នោតជ្រើសតាំងតំណាងរាស្ត្រនីតិកាលទី៧នេះ ត្រូវបានគណៈកម្មាធិការជាតិរៀបចំការបោះឆ្នោត(គ.ជ.ប) បដិសេធការចុះបញ្ជីឈរឈ្មោះបោះឆ្នោត និងបេក្ខជនឈរឈ្មោះកាលពីថ្ងៃទី១៥​ ខែឧសភាថ្មីៗនេះ។ ភាពចម្រូងចម្រាសរវាងគណបក្សភ្លើងទៀន និងគ.ជ.ប គឺស្ថិតនៅលើឯកសារនៃការចុះបញ្ជី ជាហេតុនាំឲ្យមានទស្សនៈខ្លះយល់ឃើញថាជាការសម្លាប់ប្រជាធិបតេយ្យនៅកម្ពុជា។ តើវាជាការពិតឬយ៉ាងណា?

កម្តៅនយោបាយ បានកើនឡើងមួយរំពេច នៅពេលដែលគណបក្សភ្លើងទៀនបានប្រកាសពីគម្រោងជួបជុំតស៊ូមតិ ប្រសិនបើគ.ជ.ប បន្តបដិសេធការចុះបញ្ជីគណបក្សភ្លើងទៀនចំពោះការចូលរួមការបោះឆ្នោតថ្នាក់ជាតិ២០២៣។ បណ្តាអ្នកវិភាគខ្លះយល់ថា ដំណើរការបោះឆ្នោតនៅតែប្រព្រឹត្តទៅបាន បើទោះជាគណបក្សភ្លើងទៀនមិនបានចូលរួមក៏ដោយ។ រីឯខ្លះយល់ថា ស្ថានការណ៍បោះឆ្នោតខាងមុខ គួរតែប្រព្រឹត្តទៅដោយស្មើភាព។ តើស្ថានការន៍បោះឆ្នោតប្រែប្រួលបែបណាឬទេ?​

សារ​ព័ត៌​មាន​បរទេស​មួយ​ចំនួន​ រិះ​គន់​ថា ​កម្ពុជា​បាន​ប្រើ​កីឡា​ករ​បរទេស​ មក​លេង​តំ​ណាង​ឲ្យ​កម្ពុជា ​ធ្វើ​ឲ្យ​ប៉ះ​ពាល់​ដល់​ស្មារតី​កីឡា ​អាស៊ាន​។​ ការ​លើក​ឡើង​នេះ​ ដោយសារ​តែ​កីឡាករ​កូន​កាត់​តំ​ណាង​ឲ្យ​កម្ពុជា​ទាំង​នោះ ​ដណ្តើម​បាន​មេដាយ​មាស​ជូន​កម្ពុជា​។​ ប៉ុន្តែ​សម្រាប់​ភាគី​កម្ពុជា​ ចាត់​ទុក​ថា ​ការ​លើក​ឡើង​នេះ​​ដោយ​សារ​តែ​ពួកគេ​ប្រកួត​ចាញ់​កីឡាករ​ខ្មែរ​ ហើយថា​នេះ​ជា​រឿង​ធម្មតា ពីព្រោះ​ប្រទេសមួយ​ចំនួន​ក៏​មាន​កីឡា​ករ​កូន​កាត់​មក​ចូល​រួម​ប្រកួត​តំណាង​ឲ្យ​ជាតិ​សាសន៍​របស់​ខ្លួន​ដែរ​។

ករណី​យក​លុយ​រត់​ការ​ជា​ថ្នូរ​បាន​ចូល​ក្រប​ខណ្ឌ​រដ្ឋ​ ត្រូវ​បាន​គេ​កត់​សម្គាល់​ឃើញ​ថា​ កើត​មាន​ជា​រឿយៗ​នៅ​ក្នុង​សង្គម​កម្ពុជា ​នៅ​ពេល​ណា​ដែល​ក្រសួង​ស្ថាប័ន​ចាប់​ផ្ដើម​ប្រកាស​ជ្រើសរើស​មន្រ្តី​រាជការ។​ ជាក់​ស្ដែង​ថ្មីៗ​នេះ ​មាន​ប្រជាពលរដ្ឋ​ចំនួន​ ១១គ្រួសារ​នៅ​ខេត្ត​បាត់ដំបង​ បាន​ដាក់​ពាក្យ​បណ្ដឹង​ទៅ​ក្រសួង​មហាផ្ទៃ ​ដើម្បី​ឲ្យ​ជួយ​អន្តរាគមន៍​លើ​ករណី​មន្ត្រី​ពន្ធនាគារ​ម្នាក់​ ដែល​បាន​បោក​លុយ​ពួក​គេ​ជិត​ ១០ម៉ឺន​ដុល្លារ​ ក្រោម​ហេតុ​ផល​ថា​ ជួយ​រត់​ការ​ឲ្យ​ពួក​គេ​បាន​ចូល​ក្របខ័ណ្ឌ​មន្ត្រី​នគរបាល​ជាតិ​។​

គណបក្សនយោបាយចំនួន១១ ក្នុងចំណោម២០គណបក្ស ត្រូវបានគណៈកម្មាធិការជាតិរៀបចំការបោះឆ្នោត(គ.ជ.ប)ប្រកាសទទួលស្គាល់កាលពីថ្ងៃអង្គារម្សិលមិញបន្ទាប់ពីគណបក្សទាំងនោះបានចុះបញ្ជីជាគណបក្សនយោបាយ និងបេក្ខជនឈរឈ្មោះចូលរួមបោះឆ្នោតជ្រើសតាំងសមាជិកសភានីតិកាលទី៧ ជាបន្តបន្ទាប់។ ក្រៅពីនេះគណបក្សចំនួន៩ទៀត ក្នុងនោះមានគណបក្សភ្លើងទៀនផងដែរ បានស្ថិតនៅក្នុងដំណាក់កាលនៃការពិនិត្យឯកសាររបស់ គ.ជ.ប។