Cambodia's daily events

បន្ទាប់ពី​កម្ពុជា​ប្រកាស​ពី​គម្រោង​ព្រែក​ជីក​ពី​តាកែវ​ទៅ​កាន់​សមុទ្រ​ខេត្ត​កែប​នៅ​ចុង​ឆ្នាំ​២០២៤​ នេះ​ គេឃើញ​មាន​ប្រតិកម្ម​មួយ​ចំនួន​បាន​ធ្លាក់​មក​ជា​បន្ត​បន្ទាប់​។ ​វៀតណាម​ដែល​ជា​ប្រទេស​នៅ​កៀក​នឹង​គម្រោង​ព្រែក​ជីក​«ហ្វូណនតេជោ» បាន​ប៉ុន​ប៉ង​រារាំង​គម្រោង​នេះ​ក្រោម​លេស​ពី​ការ​ប៉ះពាល់​ដល់​បរិស្ថាន​។ ចំណែក​សហរដ្ឋ​អាមេរិក​បាន​សម្តែង​ក្តី​បារម្ភ​ថា ​គម្រោង​នេះ​អាច​ជា ​«ផ្លូវ​នាវា​ចរណ៍​របស់​កង​យោធា​ជើង​ទឹក​ចិន»​។​ តែ​សម្រាប់​កម្ពុជា រាល់​ការ​លើក​ឡើង​ទាំង​នេះ​សុទ្ធ​សឹង​ជា​ហេតុ​ផល​នយោបាយ​៕​

នៅក្នុងឱកាសពិធីបុណ្យចូលឆ្នាំប្រពៃណីជាតិ រដ្ឋាភិបាលកម្ពុជា និងគណបក្សនយោបាយបានបញ្ចេញសារជូនពរជាហូរហែដល់ប្រជាពលរដ្ឋខ្មែរ ឲ្យជួបតែសុភមង្គល សិរីបវរគ្រប់ក្រុមគ្រួសារ។ គណបក្សប្រឆាំងវិញឆ្លៀតរំលេចពីសារនយោបាយរៀងៗខ្លួន ដែលប្រាថ្នាចង់ឃើញការដោះលែងអ្នកទោសនយោបាយដែលកំពុងជាប់ឃុំឃាំង ដើម្បីឲ្យពួកគេអាចមករួបរួមកម្លាំងតែមួយ ស្តារលទ្ធិប្រជាធិបតេយ្យនៅកម្ពុជាឡើងវិញ។ ក៏ប៉ុន្តែគណបក្សប្រជាជនកម្ពុជា ដែលជាគណបក្សកាន់អំណាចបានអះអាងថា ខ្លួនមិនជជែកជាមួយក្រុមអ្នកនយោបាយជ្រុលនិយមឡើយ។

គម្រោង​ព្រែកជីក​ហ្វូណន​តេជោ​របស់កម្ពុជា​ពី​ទន្លេមេគង្គ​ទៅសមុទ្រ​ប្រវែង​សរុប ​១៨០​គីឡូម៉ែត្រ ​កំពុងបង្ក​ឲ្យមាន​ការព្រួយ​បារម្ភ​ពីសំណាក់​ប្រទេស​វៀតណាម​ជាពិសេស​រឿង​បរិស្ថាន ​និង​ភូមិសាស្ត្រ​នយោបាយ​។ តើ​គម្រោងការនេះ​នឹងធ្វើឲ្យ​កម្ពុជា​អាចប្រឈម​ជាមួយ​ប្រទេស​វៀតណាម​ខាង​នយោបាយ ​និង​ទំនាក់ទំនង​មិត្តភាព​រវាង​ប្រទេស​ទាំងពីរ​ដែរ​ឬទេ​? សម្រាប់​កម្ពុជា ​ការសម្រេច​បាន​ព្រែកជីក​មួយ គឺ​ដើម្បី​បំរើដល់​យុទ្ធសាស្ត្រ​សេដ្ឋកិច្ច ​ដឹកជញ្ជូន ​និង​កសិកម្ម​របស់ខ្លួន​តែប៉ុណ្ណោះ​។

ការឡើងកម្តៅផែនដីកំពុងបង្កផលវិបាកដល់មនុស្ស សត្វ និងធនធានជីវចម្រុះគ្រប់ប្រភេទ។ ផលវិបាកនៃការឡើងកម្តៅផែនដី កំពុងត្រូវបាន មនុស្សជាច្រើនស្វែងយល់ពីមូលហេតុ និងរកមុខអ្នកទទួលខុសត្រូវ។ មន្ត្រីបរិស្ថានកម្ពុជា អះអាងថា ការប្រែប្រួលអាកាសធាតុនេះ មិនមែនមកពីកម្ពុជាកាប់បំផ្លាញព្រៃឈើទេ។ ប៉ុន្តែបញ្ហានេះគឺបណ្តាលមកពីការដុតផូស៊ីលនៅប្រទេសឧស្សាហកម្មធំៗ។ សម្រាប់សកម្មជនបរិស្ថាន ការកាប់បំផ្លាញព្រៃឈើក៏ជាផ្នែកមួយនាំឲ្យមានការប្រែប្រួលអាកាសធាតុ។

គណ​បក្ស​កម្លាំង​ជាតិ​អះអាង​ថា ខ្លួន​នៅតែ​រក្សា​ជំហរ​ដើម ​ក្នុង​ការ​ជួប​ជុំ​គ្នា ​នៅ​ទី​លាន​ប្រជា​ធិប​តេយ្យ​ដើម្បី​ទាម​ទារ​ឲ្យ​ដោះលែង​អ្នក​នយោបាយ​២​រូប​ដែល​ត្រូវ​អាជ្ញាធរ​ចាប់​ខ្លួន​ នាពេល​កន្លង​មក​នេះ​។ ​ការ​អះ​អាង​របស់​គណបក្ស​កម្លាំង​ជាតិ​ធ្វើ​ឡើង ​បន្ទាប់ពី​សាលា​រាជ​ធានី​ភ្នំពេញ​សម្រេច​ មិន​អនុញ្ញាត​ឲ្យ​គណ​បក្ស​ប្រឆាំង​នេះ​ធ្វើ​បាតុកម្ម​នៅ​ទី​លាន​ប្រជាធិប​តេយ្យ​ដើម្បី​ទាម​ទារ​ដោះ​លែង​ លោក អ៊ុំ​ វីរៈរដ្ឋ ​និង​លោក​ មឺ សេងហ៊ ហៅ គា វិសាល។ បើ​តាម អាជ្ញាធរ​ក្រុង​ ការ​ទាម​ទារ​នេះ​របស់​បក្ស​ប្រឆាំង​មិន​ត្រឹម​ត្រូវ​ ព្រោះ​សំណុំ​រឿង​នេះ​កំពុង​ស្ថិត​ក្នុង​នីតិ​វិធី​របស់​តុលា​ការ​។​ តែ​មន្ត្រី​សិទ្ធិ​មនុស្ស​លើក​ឡើង​ថា​ ភាគី​ទាំង​ពីរ​គួរ​មាន​ការសម្រប​សម្រួល​គ្នា​។

នៅឆ្នាំនេះ នៅមុនចូលឆ្នាំខ្មែរឈានចូលមកដល់ គេកត់សម្គាល់ឃើញមានការរៀបចំសង្រ្កាន្តយ៉ាងគគ្រឹកគគ្រេង នៅតាមស្ថាប័ន គ្រឹះស្ថាន សាលារៀន និងកន្លែងការងារជាដើម។ ការរៀបចំសង្រ្កាន្តក៏ឃើញមានផងដែរនៅតាមបណ្ដាប្រទេសមួយចំនួន ដូចជានៅប្រទេសថៃ កូរ៉េខាងត្បូង ជប៉ុន សហរដ្ឋអាមេរិក ដែលមានស្ថានទូតខ្មែរ និងពលរដ្ឋខ្មែររស់នៅ ធ្វើការងារនៅទីនោះ។ សម្រាប់អ្នកតាមដានសង្គមខ្លះ ការរៀបចំសង្រ្កាន្តតាមស្ថាប័នផ្សេងៗខាងលើនេះ អាចទទួលបានផលប្រយោជន៍ចំនួន២ ពោលគឺទី១ចំណេញសេដ្ឋកិច្ច និងទី២បានបង្ហាញពីវប្បធម៌ខ្មែរ៕

អ្នកនយោ​បាយគណបក្សប្រឆាំងត្រូវបានចាប់ខ្លួនជាបន្តបន្ទាប់នៅមុនពិធីបុណ្យចូលឆ្នាំខ្មែរ និង​សល់តែជាង២ខែនៃការបោះឆ្នោតជ្រើសរើស ក្រុម​ប្រឹក្សារាជធានី ខេត្ត ក្រុង ស្រុក ខណ្ឌ។ ចំណាត់ការនេះធ្វើឲ្យអ្នកនយោបាយប្រឆាំងរិះគន់រដ្ឋាភិបាលដឹកនាំដោយ លោក ហ៊ុន ម៉ាណែ​ត ថាមិនខុសគ្នានឹងការដឹក​នាំរបស់ឪពុកលោកនោះឡើយ។ ប៉ុន្តែមន្រ្តីគណបក្សប្រជាជនកម្ពុជាដែលកាន់អំណាចអះអាងថា ការចាប់ខ្លួនអ្នកនយោបាយប្រឆាំងគឺធ្វើឡើងតាមច្បាប់៕

លោក កើត សារ៉ាយ ប្រធានសមាគមសម្ព័ននិស្សិតបញ្ញវន្តខ្មែរ ត្រូវបានស្នងការក្រុងភ្នំពេញ​ចាប់ខ្លួន នៅថ្ងៃទី០៥មេសា ដោយចោទប្រកាន់ពាក់ព័ន្ធនឹងជម្លោះដីធ្លី​នៅស្រុកគូលែន ខេត្តព្រះវិហារ។ ការណ៍នេះបានញ៉ាំងឲ្យក្រុមអ្នកឃ្លាំមើលបញ្ហាសង្គម សម្តែងនូវក្តីព្រួយបារម្ភ និងថាជាការបំភិតបំភ័យសកម្មជនបរិស្ថានដទៃទៀត។ បើតាមក្រុមអ្នកឃ្លាំមើល ការចាប់ខ្លួនលោក កើត សារ៉ាយ នឹងធ្វើឲ្យសិទ្ធិសេរីភាពផ្នែកបញ្ចេញមតិកាន់តែរួមតូច។

គេបានកត់សម្គាល់ឃើញថា កម្ដៅចាប់ផ្ដើមកើនឡើងគួរឲ្យព្រួយបារម្ភ ខណៈបុណ្យចូលឆ្នាំខ្មែរឈានចូលជិតដល់។ តាមការជូនដំណឹងរបស់ក្រសួងធនធានទឹកកាលពីថ្ងៃទី១២ ខែមករា ឆ្នាំ២០២៤ កម្តៅផែនដីនៅរដូវប្រាំងនេះនឹងកើនឡើងខ្លាំងជាងឆ្នាំមុន ពោលកើនចន្លោះពី៣៧អង្សាសេទៅ៤១អង្សាសេ នៅអំឡុងខែមេសា និងដើមខែឧសភាឆ្នាំ២០២៤នេះ។ អ្នកធ្វើកិច្ចការងារបរិស្ថាន និងអ្នកតាមដានសង្គមយល់ឃើញថា កំណើនវិស័យឧស្សាហកម្ម និងការកាប់បំផ្លាញព្រៃឈើជាមូលហេតុមួយធ្វើឲ្យកម្ដៅកើនឡើង។

ការឡើងកាន់តំណែងជាប្រធានព្រឹទ្ធសភារបស់លោក ហ៊ុន សែន បាន និងកំពុងស្រោចដោយប្រតិកម្មវិជ្ជមាន និងអវិជ្ជមាន។ ប្រតិកម្មវិជ្ជមាន គឺសារអបអរតួនាទីថ្មី ក្រោយលោកហ៊ុន សែនចុះចេញពីកៅអីនាយករដ្ឋមន្ត្រី និងបានប្រគល់កៅអីនេះទៅឪ្យកូនប្រុសច្បងលោកហ៊ុន ម៉ាណែតក្នុងខែសីហា ឆ្នាំ២០២៣។ ចំណែកប្រតិកម្មអវិជ្ជមានជាសារ ដែលបានលើកឡើងថា ប្រទេសកម្ពុជាកំពុងស្ថិតក្រោមការដឹកនាំបែបគ្រួសារនិយមរបស់លោក ហ៊ុន សែន។ ដូច្នេះ ក្នុងតំណែងជាប្រធានព្រឹទ្ធសភា តើលោក ហ៊ុន សែន មានវិសាលភាពអំណាចបែបណា?

នៅថ្ងៃទី២ ខែមេសា ឆ្នាំ២០២៤ ប្រមុខរដ្ឋាភិបាលកម្ពុជាលោកហ៊ុន ម៉ាណែតបានប្រកាសបន្ថែមម៉ោងសិក្សាចំនួន២ម៉ោងដល់សិស្សថ្នាក់បឋម។ ការសាកល្បងនេះនឹងធ្វើឡើងនៅក្នុងសាលារៀនចំនួន៥០ ហើយបើជោគជ័យ គឺនឹងត្រូវដាក់ឲ្យអនុវត្តនៅទូទាំងប្រទេសតែម្តង។ អ្នកតាមដានការអប់រំបានបង្ហាញជំហរគាំទ្រផែនការមួយនេះ។ តែពួកគេចង់ឲ្យរដ្ឋាភិបាលបំពាក់សម្ភារៈបរិក្ខារឲ្យគ្រប់គាន់ដល់សាលារៀនជាមុនសិនទើបក្មេងៗថ្នាក់បឋមអាចរៀនពេញម៉ោងបាន៕

អ្នកជំនាញរបស់ធនាគារពិភពលោកបានព្យាករណ៍ថា សេដ្ឋកិច្ចកម្ពុជានៅឆ្នាំ ២០២៤ នេះនឹងមានកំណើន ៥.៨% ពោលច្រើនជាងឆ្នាំ២០២៣ ដែលមាន ៥.៤%។ បើតាមប្រធានផ្នែកសេដ្ឋកិច្ចនៃធនាគាពិភពលោក(WB) កំណើននេះបានមកពីការនាំចេញផលិតផលកាត់ដេរ ពីវិស័យទេសចរណ៍ កសិកម្ម និងការងើបឡើងវិញនៃវិស័យសំណង់ និងអចលនទ្រព្យ។ តែខុសពីធនាគារពិភពលោក រដ្ឋាភិបាលកម្ពុជាបានព្យាករណ៍កំណើនសេដ្ឋកិច្ចរបស់ខ្លួនដែលមានដល់ទៅ ៦.៦% នៅឆ្នាំ២០២៤ នេះ។ ទោះជាយ៉ាងណា អ្នកតាមដានសង្គមចង់ឃើញការបែងចែកកំណើនសេដ្ឋកិច្ចនេះមានសមធម៌ ខណៈគម្លាតរវាងអ្នកមាន និងអ្នកក្រីនៅឃ្លាតគ្នាខ្លាំងនៅឡើយ៕

មុនបុណ្យចូលឆ្នាំថ្មីប្រពៃណីជាតិខ្មែរឈានចូលមកដល់ គេសម្គាល់ឃើញមានក្រុមយុវជន និងសិស្សានុសិស្សមួយចំនួននៅរាជធានីភ្នំពេញចាប់ផ្ដើមលេងប៉ាតម្សៅ និងបាញ់ទឹកដាក់គ្នាយ៉ាងអាណាធិបតេយ្យនៅតាមដងផ្លូវ។ ហេតុការណ៍នេះបានធ្វើឲ្យមានការរិះគន់យ៉ាងខ្លាំងដោយមានការស្នើឲ្យសមត្ថកិច្ចចាត់វិធានការ និងយកពួកគេទៅអប់រំណែនាំ។ ចំណែកក្រុមអ្នកឃ្លាំមើលបញ្ហាសង្គមយល់ឃើញថា បញ្ហានេះបានកើតមានតាំងពី១០ឆ្នាំមុនម្ល៉េះ និងថា គេពិបាកនឹងលុបបំបាត់ទម្លាប់លេងមួយនេះបានភ្លាមៗ៕

ប្រ​មុខ​រដ្ឋាភិ​បាល​កម្ពុជា​បាន​ប្រកាស​នៅ​ថ្ងៃ​ទី​៣១​ខែ​មីនា​ឆ្នាំ​២០២៤​នេះ​ថា ​កម្ពុជា​បាន​ត្រៀម​ឯក​សារ​រួច​ហើយ​ដើម្បី​ស្នើ​ចុះ​«សង្ក្រាន្ត»​ទៅ​ក្នុង​បញ្ជី​បេតិក​ភណ្ឌ​ពិភព​លោក​នៅ​ឆ្នាំ​២០២៦​ បើ​គ្មាន​ការ​ប្រែ​ប្រួល​ទេនោះ​។​ ការ​បញ្ជាក់​របស់ ​លោក ​ហ៊ុន ម៉ាណែត ចេញពី​ខេត្តពោធិ៍សាត់​យ៉ាង​ដូច្នេះ គឺ​ឆ្លើយតប​នឹង​ការ​បារម្ភ​របស់​ពលរដ្ឋ​ខ្មែរ​មួយ​ចំនួន​ដែល​ថា​ កម្ពុជា​លែង​អាច​រៀប​ចំ​«សង្ក្រាន្ត»​បាន​ទៀត​ហើយ​ ដោយ​សារ​តែ​ថៃបាន​ចុះ​«សង្ក្រាន្ត»​ទៅ​ក្នុង​បញ្ជី​បេតិ​ក​ភណ្ឌ​ពិភព​លោក​រួច​ហើយ​។​

គណ​បក្ស​ប្រឆាំង​នៅ​តែ​ទាម​ទារ​ឲ្យ​រក​យុត្តិ​ធម៌​ជូន​ជន​រង​គ្រោះ​ នៅ​ក្នុង​ព្រឹត្តិ​ការណ៍​បោក​គ្រាប់​បែក​ដៃ​ កាល​ថ្ងៃ​ទី​ ៣០ មីនា ឆ្នាំ​១៩៩៧​។​ អ្នក​នយោបាយ​ប្រឆាំង ​បាន​ហៅ​ព្រឹត្តិ​ការណ៍​នោះ​ថា​«ជា​ភារ​វ​កម្ម»​ ហើយ​ថា​សំណុំ​រឿង​នេះ​ ក្លាយ​ជា​«និទណ្ឌភាព»​។​ នៅ​ក្នុង​ឱកាស​នៃ​ការ​រំឭក​ខួប​២៧​ឆ្នាំ​នៃ​ព្រឹត្តិការណ៍នេះ​ អ្នក​នយោបាយ​បក្ស​ប្រឆាំង​អំពាវ​នាវ​ឲ្យ​ផ្សះផ្សារ​ជាតិ​ឡើង​វិញ​។​ ចំណែក ​លោក សម ​រង្ស៊ី ​ដែល​ជា​អ្នក​ដឹក​នាំ​បាតុ​កម្ម​ កាល​គ្រា​នោះ ​បាន​អះអាង​ថា​ «ពន្លឺ​យុត្តិធម៌​ ចាប់​ផ្តើម​រះ​ហើយ»​ ដោយ​លោក​រំពឹងថា ​នៅចុង​ឆ្នាំ ២០២៤​នេះ ​តុលា​ការ​បារាំង នឹង​កាត់​ទោស​មេ​អង្គ​រក្ស ​លោក ​ហ៊ុន​ សែន​។​

ភាពរំជើបរំជួលនៅក្នុងវិស័យកាត់ដេរក្រោយរោងចក្របិទទ្វារដោយសារថៅកែរត់ចោល ឬមួយរងហានិភ័យផ្សេងៗត្រូវគេសង្កេតឃើញថា រដ្ឋាភិបាលក្នុងអាណត្តិនេះតាមរយៈក្រសួងការងារបានចេញមុខអន្តរាគមន៍រហ័សជាងមុន។ ឥរិយាបទបែបនេះហាក់ខុសគ្នានឹងអាណត្តិមុនៗ ដែលការតវ៉ាខ្លះក្នុងវិស័យកាត់ដេរត្រូវបានអូសបន្លាយរ៉ាំរ៉ៃ។ អ្នកពាក់ព័ន្ធនានាលើកទឹកចិត្តឲ្យមានដំណោះស្រាយបែបនេះ ដើម្បីកុំឲ្យភាគីណាមួយមានការឈឺចាប់នៅក្នុងវិវាទការងារ ដែលនឹងអាចកើតមានច្រើនទៀតនៅថ្ងៃអនាគត។

«អំណឹះតទៅ ត្រីណាស្អុយត្រូវដកត្រីនោះចេញ»។ នេះជាសំដីចេញពីបបូរមាត់រដ្ឋមន្ត្រីក្រសួងយុត្តិធម៌លោក កើត រិទ្ធ ដែលថ្លែងនៅក្នុងពិធីបើកមហាសន្និបាតបូកសរុបលទ្ធផលការងារវិស័យយុត្តិធម៌ប្រចាំឆ្នាំ២០២៣ ក្នុងថ្ងៃទី២៧មីនា។ តាមលោករដ្ឋមន្ត្រីផ្នែកច្បាប់រូបនេះ យន្តការនេះជាការពង្រឹងវិន័យក្នុងវិស័យយុត្តិធម៌ ដោយមិនអនុញ្ញាតឲ្យអ្នកណាដែលប្រព្រឹត្តខុសក្នុងប្រព័ន្ធយុត្តិធម៌ រួចធ្វើឲ្យប៉ះពាល់ដល់វិស័យយុត្តិធម៌ទាំងមូលឡើយ។ ការដាក់ចេញយន្តការនេះ បានទទួលការសាទរពីអ្នកឃ្លាំមើលបញ្ហាសង្គម។ តែទន្ទឹមគ្នានេះក៏ពួកគេយល់ថា នេះអាចគ្រាន់ជាភាសានយោបាយ ដ្បិតការដាក់ចេញយន្តការកន្លងមកនៅមិនទាន់ឃើញមានប្រសិទ្ធិភាព។

ក្នុងរយៈពេល​ចុងក្រោយនេះ ​ប្រទេស​កម្ពុជា​ត្រូវបាន​គេមើលឃើញ​ថា​កំពុងវក់វី​នឹងភាព​មន្ទិល​នៃ​ការឆបោក​ដាក់ទុន​វិនិយោគ​បែបសហគមន៍​ដោយទទួលបាន​ការ​ប្រាក់​ខ្ពស់​។ ​អ្នកតាមដាន​សង្គម​នានា​ចាត់ទុក​ភាពចម្រូងចម្រាស​នៃ​ការ​ចោទប្រកាន់​ពីការ​ឆបោកប្រាក់​ដែល​បង្កឡើង​ដោយ​អ្នកជំនួញ ​និង​បុគ្គល​ជោគជ័យ​មួយចំនួននេះ​ថា​បានជះឥទ្ធិពល​យ៉ាងខ្លាំង​ដល់​អ្នកវិនិយោគ​នៅក្នុង ​និង​ក្រៅប្រទេស​។ ​តាមអ្នកវិភាគ ​កម្ពុជា​អាចប្រឈមនឹង​វិបត្តិ​វិនិយោគ ​ប្រសិនបើ​រូបភាព​អវិជ្ជមានមួយនេះ​មិនត្រូវបាន​លាងសម្អាត​ទេនោះ​។

ការ​សម្រេច​របស់​តុលាការ​អាមេរិក​ក្នុង​ថ្ងៃ​ទី​២២​ មីនា​ ឆ្នាំ ២០២៤ ​ឲ្យ​មន្ត្រី​កសិកម្ម​កម្ពុជា​ម្នាក់​លោក​គ្រី​ ម៉ះផល​រួច​ផុត​ពី​ការ​ចោទ​ក្នុង​សំណុំ​រឿង​ជួញ​ដូរ​ស្វា​ក្តាម​ត្រូវ​បាន​ក្រសួង​កសិកម្ម​ចាត់​ទុក​ជា​រឿង​យុត្តិធម៌​ និង​បង្ហាញ​ពី​ភាព​ស្អាត​ស្អំ​របស់​មន្ត្រី​ខ្មែរ​។​ សម្រាប់​អ្នក​ខ្លះ​ដែល​តាម​ដាន​សំណុំ​រឿង​នេះ​ក៏​យល់​ឃើញ​ដូច​គ្នា ​និង​ថា ​ការ​សម្រេច​របស់​តុលាការ​អាមេរិក​នេះ​បាន​ធ្វើ​ឡើង​ដោយ​គ្មាន​ការ​ជ្រៀត​ជ្រែក​ផ្នែក​នយោបាយ​ណាមួយ​ទៅ​លើ​ប្រព័ន្ធ​យុត្តិធម៌​របស់​អាមេរិក​ទេ​។ ​តែ​សម្រាប់​អ្នក​ខ្លះ​ទៀត​បាន​ចោទ​ឡើង​ថា​ ហេតុ​អ្វី​នៅ​ក្នុង​សំ​ណុំ​រឿង​តែ​មួយ​នេះ​ តុលា​ការ​អាមេរិក​បែរ​ជា​បាន​សម្រេច​ឲ្យ​រួច​ខ្លួន​តែ​មន្ត្រី​ថ្នាក់​ទាប​ និង​ទុក​មន្ត្រី​ថ្នាក់​លើឲ្យ​នៅ​ជាប់​បណ្តឹង​ដដែល​។

ក្នុងរយៈពេលចុងក្រោយនេះ មានប្រជាពលរដ្ឋមួយចំនួនបានចេញមុខតាមបណ្ដាញសង្គមបកអាក្រាតក្រុមហ៊ុនដែលបោកប្រាស់ប្រាក់របស់ពួកគេរាប់ម៉ឺនដុល្លារ ក្រោមលេសដាក់ប្រាក់វិនិយោគដើម្បីចំណេ​ញ​ការប្រាក់។ ជាក់ស្ដែង ក្រុមហ៊ុន CIC Plc បានរងការចោទប្រកាន់ពីបទក្លែងបន្លំប្រាក់វិនិយោគរួមគ្នារាប់សិបលានដុល្លារនាពេលកន្លងមក។ ករណីនេះ ត្រូវបានអ្នកច្បាប់យល់ថា គេគួរតែអនុវត្តវិធានការច្បាប់ ប្រសិនបើមានកើតរឿងនេះប្រាកដមែន៕