Daily interviews
RFI
បទសម្ភាសជាមួយអ្នកនយោបាយ តំណាងសង្គមស៊ីវិល ឬអ្នកឯកទេសផ្សេងៗ ដើម្បីនិយាយពីព្រឹត្តិការណ៍សំខាន់ៗ ដែលកើតមានឡើងនៅក្នុងប្រទេសកម្ពុជា។
Location:
Paris, France
Networks:
RFI
Description:
បទសម្ភាសជាមួយអ្នកនយោបាយ តំណាងសង្គមស៊ីវិល ឬអ្នកឯកទេសផ្សេងៗ ដើម្បីនិយាយពីព្រឹត្តិការណ៍សំខាន់ៗ ដែលកើតមានឡើងនៅក្នុងប្រទេសកម្ពុជា។
Language:
Khmer
Episodes
លោកណុប វុធ្ធី៖អាជ្ញាធរខេត្តព្រះវិហារគ្មានយន្តការចាប់ខ្លួនពលរដ្ឋដែលរត់ចូលព្រៃទេនៅពេលនេះ
3/27/2024
ភ្ញៀវរបស់វិទ្យុបារាំងអន្តរជាតិ RFI ក្នុងថ្ងៃពុធ ទី២៧ មីនានេះគឺលោកណុប វុធ្ធី អភិបាលរងខេត្តព្រះវិហារ។ ឆ្លើយនឹងសំណួររបស់ជួប នរក្សា លោកណុប វុធ្ធីបានបញ្ជាក់ច្បាស់ៗថាមកដល់ពេលនេះ គ្មានឡើយការចាប់ខ្លួនប្រជាពលរដ្ឋដែលបានភៀសខ្លួនចូលក្នុងព្រៃនៅក្នុងសំណុំរឿងដីធ្លីក្នុងឃុំស្រយង់ ស្រុកគូលេន ខេត្តព្រះវិហារ។ ការបញ្ជាក់ដូចនេះរបស់លោក ណុប វុធ្ធីបានធ្វើឡើង ក្រោយការលើកឡើងរបស់អង្គការសង្គមស៊ីវិលដែលថា មានពលរដ្ឋមួយចំនួនកំពុងសម្ងំពួនក្នុងព្រៃដើម្បីគេចពីការចាប់ខ្លួនរបស់អាជ្ញាធរ។ បើតាមលោក ណុប វុធ្ធី បើអាជ្ញាធរខេត្តព្រះវិហារចង់ចាប់ប្រជាពលរដ្ឋទាំងនោះគឺចាប់តាំងពីថ្ងៃអន្តរាគមន៍ដំបូងមកម្ល៉េះ។
Duration:00:06:55
លោកស្រីកុយ ពិសី៖ករណីជាប់គាំងរឿងព្រំដែនរវាងគ្នា កម្ពុជា និងឡាវនឹងស្នើសុំជំនួយពីបារាំង
3/26/2024
កម្ពុជា និងឡាវសម្រេចបន្តដោះស្រាយបញ្ហាព្រំដែន ដែលនៅសេសសល់ចំនួន ១៤%ទៀតតាមវិធីសាស្ត្រដូចអ្វីដែលប្រទេសទាំងពីរបានដោះស្រាយជាមួយគ្នាបានចំនួន ៨៦% កន្លងមក។ នៅក្នុងកិច្ចសម្ភាសជាមួយវិទ្យុបារាំងអន្តរជាតិ RFI ក្នុងថ្ងៃអង្គារ ទី២៦ ខែមីនានេះ លោកស្រី កុយ ពិសី អនុប្រធានលេខាធិការដ្ឋានអចិន្ត្រៃយ៍នៃអាជ្ញាធរជាតិទទួលបន្ទុកកិច្ចការព្រំដែនកម្ពុជា បានបញ្ជាក់ថា គណៈកម្មការព្រំដែនកម្ពុជា-ឡាវ ប្តេជ្ញាបន្តដោះស្រាយបញ្ហាព្រំដែនទ្វេភាគីតាមអ្វីដែលប្រទេសទាំងពីរបានធ្វើកន្លងមក។ តែក្នុងករណីជាប់គាំង យន្តការដែលប្រមុខរដ្ឋាភិបាលទាំងពីរស្នើសុំទៅអ្នកជំនាញខាងផែនទីប្រទេសបារាំងឲ្យជួយដោះស្រាយក៏នឹងត្រូវអនុវត្តដំណាលគ្នាដែរ៕
Duration:00:08:56
លោក កត្តា អ៊ន៖ មន្រ្តីជំនាញនឹងសើរើឡើងវិញ បើរកឃើញកម្មករខ្លះមានកិច្ចសន្យាមិនកំណត់
3/25/2024
អ្នកនាំពាក្យក្រសួងការងារលោកកត្តា អ៊នបានអះអាងថា មន្ត្រីជំនាញនឹងសើរើឡើងវិញ បើរកឃើញកម្មករខ្លះនៅរោងចក្រ អ.ជី ហ៊្វូតវែមានប្រើប្រាស់កិច្ចសន្យាមិនកំណត់ថេរវេលា។ ការបំភ្លឺនេះធ្វើឡើងក្រោយពីសហជីពបានថ្លែងថា មានតែកម្មករពាក់កណ្តាលប៉ុណ្ណោះក្នុងចំណោមកម្មករជាង២ពាន់នាក់ដែលយល់ព្រមទទួលយកដំណោះស្រាយរបស់ក្រសួងការងារលើអត្ថប្រយោជន៍ចំនួន ៣ចំណុច។ ក្នុងបទសម្ភាសជាមួយវិទ្យុបារាំងអន្តរជាតិ RFI លោក កត្តា អ៊នបានថ្លែងថា រោងចក្រ អ.ជី ហ៊្វូតវែ ដែលត្រូវបានភ្លើងឆេះទើបតែដូរឈ្មោះថ្មីពីរោងចក្រចាស់ឈ្មោះ រី ជែន ។ តាមលោកកត្តា អ៊ន បើកម្មករណាដែលធ្លាប់ធ្វើការនៅរោងចក្រចាស់ និងមិនទាន់ទូទាត់អត្ថប្រយោជន៍អស់ គឺអាចសើរើឡើងវិញ៕
Duration:00:08:15
លោកហ្សង់ ម៉ាក ប៊ែរតុង៖ កម្ពុជាគួរបើកឲ្យមានអាពាហ៍ពិពាហ៍រវាងអ្នកស្រលាញ់ភេទដូចគ្នា
3/22/2024
ឯកអគ្គរដ្ឋទូតសម្រាប់សិទ្ធិអ្នកស្រលាញ់ភេទដូចគ្នា លោកហ្សង់ ម៉ាក ប៊ែរតុង បាននិងកំពុងបំពេញទស្សនកិច្ចនៅក្នុងប្រទេសកម្ពុជា។ កម្មវត្ថុនៃទស្សនកិច្ចគឺដើម្បីពង្រឹងកិច្ចពិភាក្សាលើប្រធានបទស្តីពីសិទ្ធិអ្នកស្រលាញ់ភេទដូចគ្នា។ នៅក្នុងបទសម្ភាសជាមួយវិទ្យុបារាំងអន្តរជាតិ ក្នុងថ្ងៃសុក្រទី២២មីនា លោកហ្សង់ ម៉ាក ប៊ែរតុងបានបញ្ជាក់ថា កម្ពុជាកំពុងស្ថិតលើផ្លូវដ៏ត្រឹមត្រូវ ចំពោះអ្នកស្រលាញ់ភេទដូចគ្នា តាមរយៈការអត់ឱន និងកាត់បន្ថយបានការរើសអើង។ តែលោកបានស្នើឲ្យកម្ពុជាយកចិត្តទុកដាក់បន្ថែម ពិសេសបើកទូលាយឲ្យមានអាពាហ៍ពិពាហ៍រវាងក្រុមអ្នកស្រលាញ់ភេទដូចគ្នា។ តាមលោកហ្សង់ ម៉ាក ប៊ែរតុង ការរៀបអាពាហ៍ពិពាហ៍ស្របច្បាប់ និងការទទួលបានគ្រួសារមួយពេញលេញ ជាអ្វីដែលក្រុមអ្នកស្រលាញ់ភេទដូចគ្នាប្រាថ្នាចង់បាន។
Duration:00:09:39
លោក លី សុធារ៉ាយុត្តិ៖ក្រសួងមហាផ្ទៃត្រូវអនុវត្តស្តង់ដារតែមួយលើការដោះដូរក្រុមប្រឹក្សាឃុំ-សង្កាត់
3/18/2024
គណបក្សសម្ព័ន្ធភាពឆ្ពោះទៅអនាគតបានរៀបចំសន្និសីទកាសែតក្នុងថ្ងៃទី១៨ មីនានេះ។ នាឱកាសនោះ គណបក្សភ្លើងទៀនបានស្នើឲ្យក្រសួងមហាផ្ទៃពន្លឿនការដោះដូរសមាសភាពក្រុមប្រឹក្សាឃុំ-សង្កាត់របស់គណបក្សភ្លើងទៀនឲ្យបានលឿន។ ក្នុងបទសម្ភាសជាមួយវិទ្យុបារាំងអន្តរជាតិ RFI លោក លី សុធារ៉ាយុត្តិ អគ្គលេខាធិការគណបក្សភ្លើងទៀនបានទទូចជាថ្មីឲ្យក្រសួងមហាផ្ទៃអនុវត្តស្តង់ដារតែមួយលើការដោះដូរក្រុមប្រឹក្សាឃុំ-សង្កាត់របស់គណបក្សជំទាស់មួយនេះ។ តាម លោក លី សុធារ៉ាយុត្តិ ការស្នើដូចនេះក៏ព្រោះតែមានអ្នកខ្លះបានស្លាប់ និងខ្លះទៀតទៅចុះចូលជាមួយគណបក្សផ្សេង។
Duration:00:12:35
លោក ហេង គឹមហុង៖ការបង្ក្រាបបទល្មើសព្រៃឈើគ្មានប្រសិទ្ធភាព ព្រោះខ្វះការចូលរួមពីសហគមន៍មូលដ្ឋាន
3/15/2024
នៅក្នុងឱកាសទិវាព្រៃឈើអន្តរជាតិពិភពលោកពីថ្ងៃទី១២ មីនាដល់ថ្ងៃទី២១ មីនា ឆ្នាំ ២០២៤ សមាគមបណ្តាញយុវជនកម្ពុជា និងអង្គការសង្គមស៊ីវិលចំនួន៥កំពុងបន្តធ្វើសកម្មភាពជួបជុំនៅតាមសហគមន៍ និងនៅទីលានប្រជាធិបតេយ្យដោយមានការប្រកួតប្រជែងនិយាយជាសាធារណៈអំពីព្រៃឈើ និងការតាំងពិព័រណ៍ព្រៃឈើដែលមានអ្នកចូលរួមសរុប ៥០០នាក់។ ក្នុងបទសម្ភាសជាមួយវិទ្យុបារាំងអន្តរជាតិ RFI នៅថ្ងៃទី១៥ មីនា ឆ្នាំ២០២៤នេះ លោក ហេង គឹមហុង ប្រធានប្រតិបត្តិសមាគមបណ្តាញយុវជនកម្ពុជារំពឹងថា ព្រឹត្តិការណ៍នេះនឹងញ៉ាំងឱ្យមានការចូលរួមរបស់ពលរដ្ឋកាន់តែច្រើនក្នុងការទប់ស្កាត់បទល្មើសព្រៃឈើនៅកម្ពុជា។ លោក ហេង គឹមហុងយល់ឃើញថា ប្រតិបត្តិការបង្ក្រាបបទល្មើសព្រៃឈើនៅកម្ពុជាកន្លងមកគ្មានប្រសិទ្ធភាពដោយសារខ្វះការចូលរួមពីសហគមន៍មូលដ្ឋាន។
Duration:00:13:31
អ្នកឧកញ៉ា ហ៊ុន ឡាក់៖ ឧកញ៉ាត្រឹមត្រូវមានការអៀនខ្មាស់ចំពោះការផ្សាយម៉ៅអួរពេលបុគ្គលឧកញ៉ាខ្លះធ្វើខុស
3/13/2024
នៅថ្ងៃពុធ ទី១៣ ខែមីនានេះ សមាគមឧកញ៉ាកម្ពុជាបានចេញសេចក្តីប្រកាសព័ត៌មានមួយ ដោយស្នើសុំឲ្យប្រព័ន្ធផ្សព្វផ្សាយ និងបណ្តាញសង្គមនានាផ្សាយនូវការពិត និងដោយចំពោះបុគ្គល ដែលបានប្រព្រឹត្តកំហុស ចៀសវាងការភ្ជាប់សាច់រឿងអាស្រូវទាំងអស់នោះជាមួយនឹងគោរមងារឧកញ៉ាទូទៅ។ នៅក្នុងកិច្ចសម្ភាសជាមួយវិទ្យុបារាំង RFI ក្នុងថ្ងៃទី១៣ ខែមីនា ឆ្នាំ២០២៤នេះ អ្នកឧកញ៉ា ហ៊ុន ឡាក់ អ្នកនាំពាក្យសមាគមឧកញ៉ាកម្ពុជា បានលើកឡើងថាការចេញសេចក្តីប្រកាសនៅថ្ងៃនេះ គឺដើម្បីញែកឲ្យបានច្បាស់ដល់ប្រព័ន្ធផ្សព្វផ្សាយ និងមហាជនកុំឲ្យម៉ៅបញ្ចូលគ្នាទាំងឧកញ៉ាដែលមានក្រមសីលធម៌ត្រឹមត្រូវ។ ការបញ្ជាក់របស់អ្នកនាំពាក្យសមាគមឧកញ៉ារូបនេះ ក៏ព្រោះតែឧកញ៉ា ឡេង ចាន់ណា ត្រូវបានសមត្ថកិច្ចចាប់ខ្លួន ក្រោយធ្វើសកម្មភាពបោកប្រាស់ប្រជាពលរដ្ឋជាច្រើននាក់នៅខេត្តសៀមរាប។
Duration:00:12:33
លោក ខ្វៃ អាទិត្យា៖ ការវិនិយោគតំបន់ទេសចរណ៍ខ្លះអាចប៉ះពាល់សហគមន៍
3/12/2024
ក្រសួងបរិស្ថានបានប្រកាសពីការពង្រឹងការអភិវឌ្ឍគោលដៅលំហែរបៃតងក្នុងតំបន់ការពារធម្មជាតិនៅកម្ពុជា។ ការជំរុញគោលដៅមួយនេះគឺដើម្បីបម្រើដល់ប្រយោជន៍សហគមន៍នៅតាមមូលដ្ឋាន និងការពារតំបន់ទេសចរណ៍ធម្មជាតិតាមរយៈការកាត់បន្ថយបទល្មើសព្រៃឈើ និងការទន្រ្ទានយកដីតំបន់ការពារធម្មជាតិជាដើម។ ក្នុងបទសម្ភាសជាមួយវិទ្យុបារាំងអន្តរជាតិនៅថ្ងៃទី១២ មីនា ឆ្នាំ២០២៤ លោក ខ្វៃ អាទិត្យា អ្នកនាំពាក្យក្រសួងបរិស្ថានបានបញ្ជាក់ថា កម្ពុជាមានតំបន់លំហែរបៃតងដែលជាការវិនិយោគរបស់វិស័យឯកជនសរុបចំនួន ៤៧០គម្រោងដោយគ្របដណ្តប់លើផ្ទៃដីទំហំជាង ៤២០០ហិកតា។ អ្នកនាំពាក្យក្រសួងបរិស្ថានរូបនេះទទួលស្គាល់ថា ការវិនិយោគតំបន់ទេសចរណ៍ធម្មជាតិខ្លះអាចប៉ះពាល់សហគមន៍ និងថា គម្រោងទាំងអស់សុទ្ធតែឆ្លងកាត់ការពិគ្រោះជាមួយពលរដ្ឋជាមុន។
Duration:00:16:54
លោកស្រី នៅ សុវត្ថា៖ ការគាំពារស្ត្រី និងកុមារីខ្មែរមិនមែនជាកាតព្វកិច្ចរបស់រដ្ឋាភិបាលតែមួយ
3/8/2024
ក្នុងថ្ងៃទិវានារីអន្តរជាតិ ៨មីនានេះ អង្គការឃែរកម្ពុជាដែលធ្វើការងារគាំពារ និងលើកកម្ពស់ស្ត្រីនិងកុមារកម្ពុជា បានទទួលស្គាល់ពីសមិទ្ធផលភាពជាអ្នកដឹកនាំ និងភាពធន់របស់ស្ត្រី និងកុមារីខ្មែរ។ ទន្ទឹមគ្នានេះ អង្គការឃែរក៏មើលឃើញដែរថា ស្ត្រីនិងកុមារីខ្មែរនៅតែបន្តជួបឧបសគ្គច្រើនដូចជា ការរើសអើង អំពើហិង្សា និងការរំលោភបំពានផ្សេងៗ។ ក្នុងបទសម្ភាសជាមួយវិទ្យុបារាំងអន្តរជាតិ នៅថ្ងៃសុក្រ ទី៨ មីនានេះ លោកស្រី នៅ សុវត្ថា នាយិកាអង្គការឃែរប្រចាំនៅកម្ពុជា លើកឡើងថា ការគាំពារ និងការលើកកម្ពស់ស្ត្រីនិងកុមារីកម្ពុជាមិនមែនជាកាតព្វកិច្ចរបស់រដ្ឋាភិបាលតែមួយទេ ពោលគឺត្រូវមានការចូលរួមពីគ្រប់ភាគីផ្សេងទៀត។
Duration:00:16:48
អ្នកស្រីវុន សម្ផស្ស៖ខ្ញុំឆ្លៀតពេលធ្វើការដើម្បីបង់ថ្លៃការសិក្សានៅភ្នំពេញ
3/7/2024
ថ្ងៃទី៨ ខែមីនា ឆ្នាំ២០២៤នេះ ជាទិវាសិទ្ធិនារីអន្តរជាតិ៨ មីនា។ ក្នុងឱកាសនេះ វិទ្យុបារាំងអន្តរជាតិ សូមបង្ហាញបទពិសោធន៍ជីវិតរបស់អ្នកស្រី វុន សម្ផស្ស អគ្គលេខារងសមាគម (IDEA)។ អ្នកស្រីជាស្រ្តីម្នាក់ធ្លាប់ជម្នះគ្រួសារដែលបង្ខំឲ្យរៀបការក្នុងគ្រាដែលកំពុងនៅសិក្សានៅឡើយ។ ក្រោយចប់បាក់ឌុប ស្រ្តីរូបនេះបានសម្រេចចិត្តមកបន្តការសិក្សានៅភ្នំពេញ។ នៅភ្នំពេញ អ្នកស្រី វុន សម្ផស្ស បានឆ្លៀតធ្វើការងារជាសន្តិសុខ ជាអ្នកអនាម័យតាមផ្ទះ និងជាអ្នកមើលកូនឲ្យគេ ដើម្បីបានលុយសម្រាប់បង់ថ្លៃការសិក្សា៕
Duration:00:11:13
កញ្ញា ឈឹម សុខន៖ សហជីពស្នើរដ្ឋមន្ត្រីការងារជួយដោះស្រាយដោយឥតលម្អៀងករណីវិវាទនៅក្រុមហ៊ុនណាហ្គាវើលដ៏
3/6/2024
នៅថ្ងៃពុធ ទី០៦ ខែមីនានេះ តំណាងសហជីពទ្រទ្រង់សិទ្ធិការងារបុគ្គលិកកម្មករខ្មែរនៃក្រុមហ៊ុនណាហ្គាវើលដ៍ប្រមាណ ៣០នាក់ បានដាក់ញត្តិនៅក្រសួងការងារ ដើម្បីស្នើឲ្យរដ្ឋមន្ត្រីការងារថ្មីជួយដោះស្រាយវិវាទការងាររបស់ពួកគេជាមួយថៅកែកាស៊ីណូណាហ្គាវើលដ៍ ដែលអូសបន្លាយជិត៣ឆ្នាំមកហើយ។ នៅក្នុងកិច្ចសម្ភាសន៍ជាមួយវិទ្យុបារាំងអន្តរាជាតិ RFI នៅថ្ងៃពុធនេះ កញ្ញា ឈឹម សុខន អនុប្រធានសហជីពទ្រទ្រង់សិទ្ធិការងារបុគ្គលិកកម្មករខ្មែរនៃក្រុមហ៊ុនណាហ្គាវើលដ៍ បានបញ្ជាក់ថាការស្នើសុំរដ្ឋមន្ត្រីក្រសួងការងារថ្មីឲ្យជួយដោះស្រាយវិវាទការងាររវាងបុគ្គលិក និងថៅកែ ក្រុមហ៊ុនណាហ្គាវើលដ៏ដោយឥតលម្អៀង គឺដោយសារក្រុមហ៊ុនបង្កើនការធ្វើទុក្ខបុកម្នេញមកលើបុគ្គលិកថ្មីៗបន្ថែមទៀត។
Duration:00:08:01
លោក ឆាន់ ចំរើន៖ បដិមាព្រះសិវៈរាំធំជាងគេនៅអាស៊ីគ្រោងដាក់តាំងនៅកោះកេរនៅឆ្នាំក្រោយ
3/5/2024
ក្រុមអ្នកជំនាញបច្ចេកទេសខ្មែរ និងបារាំងពីសាលាបារាំងចុងបូព៌ា បាននិងកំពុងដំឡើងនិងជួសជុលរូបព្រះសិវៈរាំ ពីបំណែកថ្មតូចធំជាង១ម៉ឺនដុំ ដែលមានប្រភពមកពីតួប្រាសាទក្រហមនៅកោះកេរ នាសតវត្សទី១០។ ក្នុងបទសម្ភាសជាមួយវិទ្យុបារាំងនៅថ្ងៃទី៥កុម្ភៈ ឆ្នាំ២០២៤ លោក ឆាន់ ចំរើន អនុប្រធាននាយកដ្ឋានគាំពារ និងអភិរក្សសំណង់បុរាណនៃក្រសួងវប្បធម៌នៅអភិរក្សដ្ឋានអង្គរ ឱ្យដឹងថា រយៈពេល៦ឆ្នាំមកនេះ ការផ្គុំថ្មនិងការដំឡើងរូបបដិមារធំជាងគេនៅអាស៊ីនេះ បានសម្រេច៨០%ហើយ ខណៈផ្នែកសេសសល់២០%ទៀត អ្នកជំនាញនឹងបន្តជួសជុល និងបំពេញដោយការប្រើល្បាយថ្មថ្មីជំនួសឱ្យថ្មដែលផ្គុំមិនបាន។ តាមបុរាណវិទូរូបនេះ រូបព្រះសិវៈរាំនឹងមានរូបរាងតាមទម្រង់ដើមវិញនៅឆ្នាំ២០២៥ខាងមុខ និងបើតាមគម្រោងរូបបដិមាដ៏ល្អល្អះនេះនឹងត្រូវដាក់តាំងបង្ហាញជាថ្មី ក្នុងទីតាំងណាមួយក្បែរប្រាសាទក្រហម នៅកោះកេរដដែល។
Duration:00:13:46
លោក ជួន សុវណ្ណវាសនា៖ ការបរាជ័យរឿងខ្មែរនៅរោងកុនថៃដោយសារបញ្ហាជាតិនិយម
3/4/2024
នៅប៉ុន្មានថ្ងៃនេះ ពលរដ្ឋកម្ពុជាមួយចំនួន ប្រកាសធ្វើពហិកាឈប់មើលភាពយន្តថៃ។ ការធ្វើពហិកានេះគឺបន្ទាប់ពីភាពយន្តខ្មែរ ដែលមានចំណងជើងថា «ម៉ែក្រឡាភ្លើង» ដែលត្រូវបានចាក់បញ្ចាំងនៅថៃគឺទទួលបរាជ័យ៣ថ្ងៃផ្ទួនៗគ្នា ដោយសារតែមិនសូវមានអ្នកចូលទស្សនា។ ពលរដ្ឋថៃខ្លះចោទថា ភាពយន្តខ្មែរ«ម៉ែក្រឡាភ្លើង»នេះ គឺចម្លងចេញពីភាពយន្តថៃ ដែលមានចំណងថា«ខ្មោចនាងណាត»។ ក្នុងបទសម្ភាសជាមួយRFI លោក ជួន សុវណ្ណវាសនា ជាអ្នកដឹកនាំការសម្តែង និងជាអ្នកនិពន្ធរឿងម្នាក់ យល់ថា ការបរាជ័យរបស់ភាពយន្តខ្មែរនៅរោងកុនថៃ គឺដោយសារតែការបំផុសរឿងជាតិនិយមរបស់ពលរដ្ឋថៃមួយចំនួន។
Duration:00:11:56
សម្តេច ឈឹង ប៊ុនឈា៖ ព្រះបរមសពសម្តេចសង្ឃរាជ ទេព វង្ស ត្រូវតម្កល់រហូតដល់១០០ថ្ងៃ
3/1/2024
សម្តេចព្រះអគ្គមហាសង្ឃរាជាធិបតី ទេព វង្ស បានយាងចូលទិវង្គតនៅថ្ងៃទី២៦ ខែកុម្ភៈ ឆ្នាំ២០២៤ ដោយរោគាពាធក្នុងជម្មាយុ ៩៣ព្រះវស្សា។ ក្នុងកិច្ចសម្ភាសន៍ជាមួយវិទ្យុបារាំងអន្តរជាតិ RFI នៅថ្ងៃសុក្រ ទី០១ ខែមីនា ឆ្នាំ២០២៤នេះ សម្តេចព្រះឧត្តមចរិយា ឈឹង ប៊ុនឈា អនុប្រធានគណៈកម្មការរៀបចំពិធីបុណ្យថ្វាយព្រះសពសម្តេចសង្ឃរាជ ទេព វង្ស បានមានសង្ឃដីកាថា ពិធីបុណ្យត្រូវបានបែងចែកជាពីរដំណាក់កាល។ ដំណាក់កាលទី១ គឺពិធីគោរពវិញ្ញាណក្ខន្ធផ្លូវការ ដែលមានរយៈពេល៧ថ្ងៃ ហើយដំណាក់កាលទី២ គឺការបន្តតម្កល់ព្រះសពរហូតដល់១០០ថ្ងៃ។ ដោយឡែក ពិធីបូជាថ្វាយព្រះភ្លើងនឹងត្រូវធ្វើឡើងនៅដើមខែមិថុនា។
Duration:00:08:58
ឧកញ៉ាសុង សារ៉ន៖ កម្មវិធីទិញលក់ស្រូវតាមទូរស័ព្ទនឹងជួយកសិកររកទីផ្សារស្រូវ
2/28/2024
កាលពីថ្ងៃទី២៧ ខែកុម្ភៈ ឆ្នាំ២០២៤ សហព័ន្ធស្រូវអង្ករកម្ពុជា បានប្រកាសដាក់ឲ្យដំណើរការជាផ្លូវការនូវកម្មវិធីទិញលក់ស្រូវតាមទូរស័ព្ទដៃ(Paddy App) ដើម្បីផ្តល់ភាពងាយស្រួលដល់កសិករក្នុងការដាក់លក់ស្រូវតាមប្រព័ន្ធឌីជីថល។ កម្មវិធីដែលគាំទ្រដោយទីភ្នាក់ងារអភិវឌ្ឍន៍បារាំង AFD មួយនេះ បានដាក់ឲ្យសហគមន៍កសិករជាង៣០ ដែលតំណាងឲ្យជាង១ម៉ឺនគ្រួសារ ធ្វើការសាកល្បងដាក់លក់ផលិតផលរបស់គាត់។ នៅក្នុងកិច្ចសម្ភាសជាមួយវិទ្យុបារាំងនៅថ្ងៃពុធ ទី២៨ ខែកុម្ភៈនេះ លោកឧកញ៉ា សុង សារ៉ន ប្រធានក្រុមប្រឹក្សាភិបាលសហព័ន្ធស្រូវអង្ករកម្ពុជាបានគូសបញ្ជាក់ថាកម្មវិធីទិញលក់ស្រូវតាមទូរស័ព្ទដៃនេះ ពិតជាមានសារៈសំខាន់ដល់កសិករក្នុងការស្វែងរកទីផ្សារលក់ស្រូវរបស់ពួកគាត់តាមប្រព័ន្ធឌីជីថល។
Duration:00:11:33
លោកស្រី កែវ ប៉ូលីន៖កុមារអូទីស្សឹមត្រូវការការអប់រំ និងការរស់នៅគ្មានការរើសអើង
2/27/2024
«ផារ៉ត» ជាមត្តេយ្យសិក្សាឯកជនមួយនៅកម្ពុជាដែលកំពុងប្រើប្រាស់វិធីសាស្ត្រអប់រំកុមារមានអូទីស្សឹម តាមកម្មវិធីបង្រៀនបច្ចេកទេស ABA (Applied Behavior Analysis) ដោយផ្តោតសំខាន់លើការបន្ថយវិបត្តិអាកប្បកិរិយាកុមារ។ ក្នុងបទសម្ភាសជាមួយវិទ្យុបារាំងអន្តរជាតិ លោកស្រី កែវ ប៉ូលីន ស្ថាបនិកមត្តេយ្យសិក្សាផារ៉ុតជឿជាក់ថា វិធីសាស្ត្របង្រៀនបច្ចេកទេសស្តង់ដាអាមេរិកមួយនេះអាចជួយកុមារមានអូទីស្សឹមឪ្យមានម្ចាស់ការលើខ្លួនឯង និងអាចបង្កើតទំនាក់ទំនងជាមួយសង្គមខាងក្រៅបាន។ តាមលោកស្រី កែវ ប៉ូលីន កុមារអូទីស្សឹមត្រូវការការអប់រំឥរិយាបថនិងបំណិនជីវិត និងត្រូវការការរស់នៅដោយគ្មានការរើសអើងពីសង្គម។
Duration:00:12:32
លោក ញឹក ប៊ុនឆៃ៖ លទ្ធផលបោះឆ្នោតព្រឹទ្ធសភា ជំរុញឲ្យបក្សខ្មែររួបរួមជាតិ ចូលរួមបោះឆ្នោតពេលខាងមុខ
2/26/2024
គណបក្សខ្មែររួបរួមជាតិរបស់ លោក ញឹក ប៊ុនឆៃ ប្រកាសចូលរួមបោះឆ្នោតជ្រើសរើសក្រុមប្រឹក្សារាជធានី ខេត្ត ក្រុង ស្រុក ខណ្ឌ នាពេលដ៍ខ្លីខាងមុខ។ ការប្រកាសនេះធ្វើឡើងនៅក្នុងអង្គសមាជគណបក្សខ្មែររួបរួមជាតិនៅថ្ងៃទី២៦ កុម្ភៈនេះ។ នៅក្នុងបទសម្ភាសផ្តាច់មុខជាមួយ RFI នៅក្រោយសមាជ លោក ញឹក ប៊ុនឆៃ ថ្លែងថា លទ្ធផលនៃការបោះឆ្នោតព្រឹទ្ធសភាបង្ហាញច្បាស់ពីការបែកសំឡេងរបស់គណបក្សប្រឆាំង។ តាមអតីតមេទ័ពរូបនេះ ការបែកសំឡេងរបស់បក្សប្រឆាំងជាឱកាសមួយជំរុញឲ្យគណបក្សខ្មែររួបរួមជាតិត្រូវតែចូលរួមបោះឆ្នោតអសកលនៅថ្ងៃទី២៦ ឧសភា ឆ្នាំ២០២៤នេះ។
Duration:00:13:02
លោក ហង្ស ពុទ្ធា៖ ដំណើរការឃោសនាបោះឆ្នោតព្រឹទ្ធសភាមានភាពចាស់ទុំ និងគ្មានបណ្តឹង
2/23/2024
យុទ្ធនាការឃោសនារកសម្លេងគាំទ្រសម្រាប់ការបោះឆ្នោតជ្រើសតាំងសមាជិកព្រឹទ្ធសភានីតិកាលទី៥ បានបិទបញ្ចប់នៅថ្ងៃទី២៣ ខែកុម្ភៈនេះ បន្ទាប់ពីបានធ្វើឡើងអស់រយៈពេល២សប្តាហ៍កន្លងទៅ។ ថ្ងៃទី២៤ កុម្ភៈស្អែកជាថ្ងៃស ហើយថ្ងៃទី២៥ កុម្ភៈ ជាថ្ងៃបោះឆ្នោត។ គណបក្សនយោបាយចំនួន៤ គឺគណបក្សប្រជាជនកម្ពុជា គណបក្សឆន្ទៈខ្មែរ គណបក្សកម្លាំងជាតិ និងគណបក្សហ្វុនស៊ីនប៉ិចបានចូលប្រកួតប្រជែងនៅក្នុងការបោះឆ្នោតអសកលនេះ។ នៅក្នុងកិច្ចសម្ភាសជាមួយវិទ្យុបារាំង RFI នាថ្ងៃសុក្រ ទី២៣ ខែកុម្ភៈនេះ លោក ហង្ស ពុទ្ធា សមាជិក និងជាអ្នកនាំពាក្យគណៈកម្មាធិការជាតិរៀបចំការបោះឆ្នោតបានបញ្ជាក់ថា យុទ្ធនាការឃោសនារកសម្លេងឆ្នោតរបស់គណបក្សនយោបាយទាំង៤ រយៈពេល២សប្តាហ៍មកនេះ គឺបានប្រព្រឹត្តទៅដោយរលូន។
Duration:00:10:02
លោកសុះ ម៉ាច៖ប្រធានសមាគមសិល្បករត្រូវតែជាបុគ្គលដែលមានកិត្តិយស និងគ្មានរឿងអាស្រូវ
2/21/2024
ប្រមាណជាមួយសប្តាហ៍ចុងក្រោយនេះ ភាពចម្រូងចម្រាសមតិនៅក្នុងចំណោមមហាជន និងអ្នកសិល្បៈបានកើតឡើងយ៉ាងព្រោងព្រាតនៅលើបណ្តាញសង្គមជុំវិញការជ្រើសរើសប្រធានសមាគមសិល្បករខ្មែរអាណត្តិថ្មី។ ក្នុងបទសម្ភាសជាមួយវិទ្យុបារាំងអន្តរជាតិ RFI នៅថ្ងៃពុធ ទី២១ ខែកុម្ភៈនេះ លោក សុះ ម៉ាច ដែលជាអតីតប្រធានសមាគមសិល្បករខ្មែរ ២អាណត្តិ បានចូលរួមជាទស្សនៈថា ប្រធានសមាគមត្រូវតែជាបុគ្គល ដែលមានលក្ខណៈសម្បត្តិល្អ មានចំណេះដឹង មានសីលធម៌ គុណធម៌ មានបេះដូងស្រលាញ់ និងជួយដល់សិល្បៈ។ បន្ថែមពីនេះ តារាចម្រៀងជើងចាស់កូនកាត់ខ្មែរឥស្លាមរូបនេះបញ្ជាក់ថាប្រធានសមាគមសិល្បៈក៏ត្រូវតែជាអ្នកប្រឡូកក្នុងវិស័យសិល្បៈយូរអង្វែង ជាបុគ្គលប្រកបដោយកិត្តិយស សេចក្តីថ្លៃថ្នូរ និងគ្មានរឿងអាស្រូវពីក្រោយខ្នង។
Duration:00:12:52
កញ្ញាឈឹម សុខន៖ ទង្វើក្រុមហ៊ុនណាហ្គាវើលដ៍ជាការយាយីដែលផ្ទុយច្បាប់ការងារ
2/20/2024
សហជីពទ្រទ្រង់សិទ្ធិការងារបុគ្គលិកកម្មករខ្មែរនៃក្រុមហ៊ុនណាហ្គាវើលដ៍ចោទថា ក្រុមហ៊ុនណាហ្គាវើលដ៍បានដាក់លក្ខខណ្ឌឱ្យបុគ្គលិកសរសេរលិខិតលាលែងចេញពីសហជីព និងសរសេរលិខិតស្នើសុំដកវិភាគទានសហជីពដែលក្រុមហ៊ុនបានបង្កក។ នៅក្នុងបទសម្ភាសជាមួយវិទ្យុបារាំងអន្តរជាតិនៅថ្ងៃទី២០កុម្ភៈនេះ កញ្ញា ឈឹម សុខន ចាត់ទុកទង្វើរបស់ក្រុមហ៊ុនណាហ្គាវើលដ៍នេះជាការយាយី និងដាក់សម្ពាធដែលផ្ទុយពីច្បាប់ស្តីពីការងារ។ តាមកញ្ញា ឈឹម សុខន មានកម្មករនយោជិតប្រមាណជាង៤០០នាក់ កំពុងបន្តចូលរួមធ្វើកូដកម្មជាមួយសហជីព។ កញ្ញា ឈឹម សុខន បដិសេធទាំងស្រុងចំពោះការចោទថាកូដកម្មរបស់សហជីពក្នុងរយៈពេលជាង២ឆ្នាំមកនេះមានពាក់ព័ន្ធនឹងនយោបាយ និងទទួលជំនួយពីបរទេស។
Duration:00:11:58