Daily interviews
RFI
បទសម្ភាសជាមួយអ្នកនយោបាយ តំណាងសង្គមស៊ីវិល ឬអ្នកឯកទេសផ្សេងៗ ដើម្បីនិយាយពីព្រឹត្តិការណ៍សំខាន់ៗ ដែលកើតមានឡើងនៅក្នុងប្រទេសកម្ពុជា។
Location:
France
Genres:
Arts & Culture Podcasts
Networks:
RFI
Description:
បទសម្ភាសជាមួយអ្នកនយោបាយ តំណាងសង្គមស៊ីវិល ឬអ្នកឯកទេសផ្សេងៗ ដើម្បីនិយាយពីព្រឹត្តិការណ៍សំខាន់ៗ ដែលកើតមានឡើងនៅក្នុងប្រទេសកម្ពុជា។
Language:
Khmer
Episodes
លោក សឿ វណ្ណៈ ៖ការប្រកួតនៅបារាំងជាការបង្ហាញ«គុនខ្មែរ»ទៅកាន់ពិភពលោក
5/22/2024
កីឡាករប្រដាល់ «គុនខ្មែរ» របស់កម្ពុជាជិត១០រូបនឹងចេញដំណើរទៅបារាំងដើម្បីប្រកួតប្រដាល់ «គុនខ្មែរ» មិត្តភាពអន្តរជាតិ និងដណ្តើមខ្សែក្រវាត់ពិភពគុនខ្មែរ (WKF) នៅថ្ងៃទី២ ខែមិថុនា ក្នុងទីក្រុងប័រដូ។ ក្នុងបទសម្ភាសជាមួយវិទ្យុបារាំងអន្តរជាតិ RFI លោក សឿ វណ្ណៈ អ្នករៀបចំព្រឹត្តិការណ៍គុនខ្មែរបានដាក់ក្តីរំពឹងថា ការប្រកួតលើកនេះអាចនឹងទទួលបានលទ្ធផលល្អ ព្រោះកីឡាករដែលបញ្ជូនទៅសុទ្ធតែជើងខ្លាំង។ កីឡាករ ដែលបញ្ជូនទៅមាន ឈឿង ល្វៃ ត្រូវប្រកួតជាមួយ Omar Samb ក្នុងតំណែងគូឯក, លន បញ្ញា ប៉ះ Omar Bathily, ទួន ស្រីពិន ប៉ះ Marika Orel, និងកីឡាករ សៀង ហៃ ដែលកំពុងហ្វិកហាត់នៅបារាំង ប៉ះជាមួយ Mazouz។ លោក សឿ វណ្ណៈ បានបន្ថែមថា ការប្រកួតនេះលើសពីមិត្តភាពទៅទៀត ព្រោះជាឱកាសដែលកម្ពុជាអាចបង្ហាញ «គុនខ្មែរ» ទៅកាន់ពិភពលោក។
Duration:00:11:38
លោកយង់ គិមអេង៖កម្ពុជាត្រូវតែមានច្បាប់ស្តីពីការគ្រប់គ្រងគ្រឿងស្រវឹងជាបន្ទាន់
5/21/2024
នៅថ្ងៃអង្គារ ទី២១ ខែឧសភានេះ មជ្ឈមណ្ឌលប្រជាពលរដ្ឋដើម្បីអភិវឌ្ឍន៍ និងសន្តិភាពបានរៀបចំសន្និសីទមួយស្តីពីគោលនយោបាយគ្រប់គ្រងគ្រឿងស្រវឹងដោយមានការចូលរួមពីអ្នកជំនាញបរទេស និងស្ថាប័នពាក់ព័ន្ធនានារបស់រដ្ឋាភិបាលកម្ពុជា។ នៅក្នុងកិច្ចសម្ភាសជាមួយវិទ្យុបារាំងអន្តរជាតិ RFI នាថ្ងៃទី២១ ខែឧសភា ឆ្នាំ២០២៤នេះ លោក យង់ គិមអេង ប្រធានមជ្ឈមណ្ឌលប្រជាពលរដ្ឋដើម្បីអភិវឌ្ឍន៍ និងសន្តិភាពបានបញ្ជាក់ថា នៅក្នុងស្ថានភាពបច្ចុប្បន្នទាក់ទងនឹងមហន្តរាយដែលបណ្តាលមកពីគ្រឿងស្រវឹង ប្រទេសកម្ពុជាចាំបាច់ត្រូវមានច្បាប់ និងគោលនយោបាយគ្រប់គ្រងគ្រឿងស្រវឹងជាបន្ទាន់៕
Duration:00:09:15
លោក មាស សុខសេនសាន៖ រដ្ឋាភិបាលអាណត្តិនេះមិនខ្ជះខ្ជាយថវិកាទេ
5/20/2024
ការព្យួរការចំណាយថវិកាសម្រាប់ផ្នែកខ្លះនៅថ្នាក់ក្រោមជាតិមិនមែនដោយសាររដ្ឋាភិបាលជួបវិបត្តិហិរញ្ញវត្ថុទេ តែជាការធ្វើវិចារណកម្មដោយគិតគូរល្អិតល្អន់ពីការប្រើប្រាស់ថវិកាជាតិឲ្យមានប្រសិទ្ធភាព។ នេះជាការបកស្រាយរបស់អ្នកនាំពាក្យក្រសួងសេដ្ឋកិច្ចលោកមាស សុខសេនសាននៅក្នុងបទសម្ភាសជាមួយវិទ្យុបារាំងអន្តរជាតិ RFI។ តាមលោកមាស សុខសេនសាន ទោះមានការវាយតម្លៃលើវិបត្តិហិរញ្ញវត្ថុរបស់រដ្ឋាភិបាលពីសំណាក់ក្រុមនៅក្រៅរដ្ឋាភិបាលច្រើនលើកក៏រដ្ឋាភិបាលនៅតែដើរទៅមុខ។ ជាមួយគ្នានេះ លោកមាស សុខសេនសានក៏បានបញ្ជាក់ថា លុយដែលកម្ពុជាបានខ្ចីពីកូរ៉េចំនួន ៣ពាន់លានដុល្លារមិនមែនដើម្បីបង្រ្គប់ការចំណាយថវិកាជាតិទេ តែដើម្បីវិនិយោគលើវិស័យមួយចំនួននៅកម្ពុជា៕
Duration:00:13:38
បោះឆ្នោតក្រុមប្រឹក្សា៖បក្សឆន្ទៈខ្មែររំពឹងយកសំឡេងបាត់មកវិញ តែបក្សប្រជាជនរំពឹងកើនសំឡេងដដែល
5/17/2024
ថ្ងៃទី១៧ ឧសភា ឆ្នាំ២០២៤ នេះជាថ្ងៃដំបូងដែលគណបក្សនយោបាយចំនួន៥ បានចាប់ផ្តើមធ្វើយុទ្ធនាការឃោសនាបោះឆ្នោតជ្រើសរើសក្រុមប្រឹក្សារាជធានី ខេត្ត ក្រុង ស្រុក ខណ្ឌ អាណត្តិទី៤ ដែលនឹងប្រព្រឹត្តទៅនៅថ្ងៃទី២៦ ខែឧសភា ឆ្នាំ២០២៤។ នៅក្នុងកិច្ចសម្ភាសជាមួយវិទ្យុបារាំង RFI នាថ្ងៃសុក្រ ទី១៧ ឧសភានេះ លោក គង់ មុនីកា អគ្គលេខាធិការគណបក្សឆន្ទៈខ្មែរបានគូសបញ្ជាក់ដោយដាក់ក្តីសង្ឃឹមថា សំឡេងគាំទ្រដែលបានបាត់បង់ទៅលើគណបក្សប្រជាជននៅក្នុងការបោះឆ្នោតព្រឹទ្ធសភាកន្លងទៅ នឹងត្រូវគណបក្សឆន្ទៈខ្មែរយកមកវិញ។ ផ្ទុយពីលោក គង់ មុនីកា លោក ឈឹម ផលវរុណ អ្នកនាំពាក្យគណបក្សប្រជាជនបានដាក់ក្តីរំពឹងថា សំឡេងគាំទ្រដែលបក្សប្រជាជនទទួលបានកំណើននៅក្នុងការបោះឆ្នោតព្រឹទ្ធសភានឹងបន្តកើនឡើងដដែលនៅក្នុងការបោះឆ្នោតជ្រើសរើសក្រុមប្រឹក្សាថ្នាក់ក្រោមជាតិអាណត្តិទី៤នេះ។
Duration:00:12:29
លោកថោង សូលីម៉ូ៖សមយុទ្ធកម្ពុជា-ចិនឆ្នាំ ២០២៤ ផ្តោតលើការប្រឆាំងភេវកម្ម
5/16/2024
សមយុទ្ធនាគមាសកម្ពុជា-ចិនឆ្នាំ២០២៤ បានចាប់ផ្តើមជាផ្លូវការនៅថ្ងៃព្រហស្បតិ៍ ទី១៦ឧសភានេះនៅមជ្ឈមណ្ឌលហ្វឹកហ្វឺនកងរាជអាវុធហត្ថភ្នំជុំសែនរីករាយក្នុងស្រុកសាមគ្គីមានជ័យ ខេត្តកំពង់ឆ្នាំង។ សមយុទ្ធរវាងកម្ពុជា-ចិនលើកទី៦នឹងធ្វើឡើងរយៈពេល១៥ថ្ងៃដោយផ្តោតលើ «ប្រតិបត្តិការប្រឆាំងភេរវកម្មរួមគ្នា និងការងារសង្គ្រោះមនុស្សធម៌»។ គួររម្លឹកថា នៅមុនសមយុទ្ធចាប់ផ្តើម មន្ត្រីជាន់ខ្ពស់នៃក្រសួងការពារជាតិកម្ពុជាបានបញ្ជាក់ថា កម្ពុជាធ្វើសមយុទ្ធជាមួយចិនមិនមានបំណងប្រឆាំងប្រទេសណាមួយទេ។ ក្នុងបទសម្ភាសជាមួយវិទ្យុបារាំងអន្តរជាតិនាថ្ងៃទី១៦ ឧសភានេះ លោក ថោង សូលីម៉ូ អ្នកនាំពាក្យអគ្គបញ្ជាការដ្ឋានកងយុទ្ធពលខេមរភូមិន្ទបានអះអាងថា ការផ្តោតសំខាន់លើការប្រឆាំងភេវកម្ម ព្រោះវាជាបញ្ហាដែលរដ្ឋាភិបាលកម្ពុជាតែងតែយកចិត្តទុកដាក់ និងមិនអាចមើលស្រាលបាន។ សូមស្តាប់បទសម្ភាសទាំងស្រុងរវាង ជួប នរក្សា និងលោក ថោង សូលីម៉ូ៖
Duration:00:07:45
លោក ហេង គឹមហុង៖ការជិះកង់មានឧបសគ្គទាំងបញ្ហាធម្មជាតិ និងការតាមដានរបស់អាជ្ញាធរ
5/15/2024
ក្រុមយុវជនជិត៣០នាក់ជិះកង់បានរយៈចម្ងាយ៧០០គីឡូម៉ែត្រហើយដើម្បីបរិស្ថាន ខណៈគោលដៅចុងក្រោយរបស់ពួកគេ គឺជិះកង់ឲ្យបានចម្ងាយមួយពាន់គីឡូម៉ែត្រ។ ក្នុងបទសម្ភាសជាមួយវិទ្យុបារាំងអន្តរជាតិ RFI លោក ហេង គឹមហុង ប្រធានប្រតិបត្តិសមាគមបណ្តាញយុវជនកម្ពុជាបានកត់សម្គាល់ពីឧបសគ្គចំនួនពីរ គឺឧបសគ្គដែលកើតឡើងធម្មជាតិ និងឧបសគ្គកើតឡើងដោយអាជ្ញាធរ។ តែទោះជាយ៉ាងណា លោក និងក្រុមលោកនឹងបន្តជិះកង់ឲ្យដល់គោលដៅក្នុងន័យជំរុញឲ្យភាគីពាក់ព័ន្ធយកចិត្តទុកដាក់ពីបញ្ហាបរិស្ថាន។
Duration:00:10:09
លោក កត្តា អ៊ន៖ពលការិនី៥២រូបក្នុងចំណោម៩០រូប ត្រូវបានសង្គ្រោះពីអារ៉ាប៊ី សាអូឌីត
5/14/2024
គិតត្រឹមថ្ងៃទី១៤ ខែឧសភា ឆ្នាំ២០២៤នេះ ក្រសួងការងារបានបញ្ចូនពលការិនីខ្មែរចំនួន ៥២រូបក្នុងចំណោមពលការិនីសរុប ៩០រូប ដែលចាញ់បោកមេខ្យល់នាំទៅធ្វើការនៅប្រទេសអារ៉ាប៊ី សាអូឌីត។ នៅក្នុងកិច្ចសម្ភាសន៍ជាមួយវិទ្យុបារាំងអន្តរជាតិ RFI នៅថ្ងៃអង្គារ ទី១៤ ខែឧសភានេះ លោក កត្តា អ៊ន ប្រធានក្រុមអ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈបានបញ្ជាក់ថា ពលការិនីខ្មែរទាំង៩០នាក់នឹងត្រូវធ្វើមាតុភូមិនិវត្តន៍មកកម្ពុជាទាំងអស់នៅពេលឆាប់ៗខាងមុខនេះ។ តាម លោក កត្តា អ៊ន ក្រសួងការងារក៏កំពុងដំណើរការនីតិវិធីស៊ើបអង្កេតដំណាលគ្នាដែរលើក្រុមហ៊ុន និងបុគ្គលដែលជាមេខ្យល់បោកប្រាស់នាំពលការិនីទៅធ្វើការនៅអារ៉ាបី សាអូឌីត។
Duration:00:06:17
លោក ហង្ស ពុទ្ធា៖ការចាប់ខ្លួនលោក ស៊ុន ចន្ធី មិនប៉ះពាល់ដល់ការបោះឆ្នោតក្រុមប្រឹក្សាទេ
5/10/2024
នៅថ្ងៃអាទិត្យទី២៦ ខែឧសភា ឆ្នាំ២០២៤ ខាងមុខ ប្រទេសកម្ពុជានឹងរៀបចំការបោះឆ្នោតអសកលដើម្បីជ្រើសរើសក្រុមប្រឹក្សារាជធានី ខេត្ត ក្រុង ស្រុក ខណ្ឌ អាណត្តិទី៤។ គណបក្សចំនួន៥ បានចុះឈ្មោះប្រកួតប្រជែង រួមមានគណបក្សប្រជាជនកម្ពុជា គណបក្សឆន្ទៈខ្មែរ គណបក្សកម្លាំងជាតិ គណបក្សហ្វុនស៊ិនប៉ិច និងគណបក្សខ្មែររួបរួមជាតិ។ នៅក្នុងកិច្ចសម្ភាសជាមួយវិទ្យុបារាំងអន្តរជាតិ RFI នៅថ្ងៃសុក្រទី១០ ខែឧសភា ឆ្នាំ២០២៤នេះ លោក ហង្ស ពុទ្ធា ប្រធានក្រុមអ្នកនាំពាក្យគណៈកម្មាធិការជាតិរៀបចំការបោះឆ្នោតបានបញ្ជាក់ថា ការចាប់ខ្លួនលោក ស៊ុន ចន្ធី ប្រធានគណបក្សកម្លាំងជាតិកាលពីថ្ងៃទី០៩ ខែឧសភា មិនប៉ះពាល់ដល់ការបោះឆ្នោតអសកលមួយនេះទេ។
Duration:00:08:58
លោក ជា មុនី៖ ការចាប់ខ្លួនលោក ស៊ុន ចន្ធី មានបង្កប់រឿងនយោបាយច្រើនជាង
5/9/2024
លោក ស៊ុន ចន្ធី ប្រធានគណបក្សកម្លាំងជាតិត្រូវបានអាជ្ញាធរចាប់ខ្លួនភ្លាមៗ បន្ទាប់ពីលោកមកដល់ព្រលានយន្តហោះភ្នំពេញនៅព្រឹកថ្ងៃទី០៩ ខែឧសភា ឆ្នាំ២០២៤នេះ ក្នុងដំណើរត្រលប់មកពីប្រទេសជប៉ុនដែលលោកធ្វើទស្សនកិច្ច និងប្រកាសសុពលភាពតំណាងគណបក្សកម្លាំងជាតិប្រចាំប្រទេសជប៉ុន។ តាមរយៈកិច្ចសម្ភាសខ្លីជាមួយវិទ្យុបារាំង RFI នៅថ្ងៃព្រហស្បតិ៍ ទី០៩ ខែឧសភានេះដែរ លោក ជា មុនី អនុប្រធាន និងជាអ្នកនាំពាក្យគណបក្សកម្លាំងជាតិដែលបានរួមដំណើរជាមួយលោក ស៊ុន ចន្ធី ទៅប្រទេសជប៉ុន បានបញ្ជាក់ថា ការចាប់ខ្លួនលោក ស៊ុន ចន្ធី បានធ្វើឡើងដោយសមត្ថកិច្ចមិនបានបង្ហាញដីកា និងប្រាប់ពីបទល្មើសអ្វីទាំងអស់។ តាមលោក ជា មុនី ការចាប់ប្រធានគណបក្សកម្លាំងជាតិរូបនេះមានជាប់ពាក់ព័ន្ធនឹងរឿងនយោបាយច្រើនជាងបញ្ហាផ្សេងៗទៀត។
Duration:00:05:45
លោក អំ សំអាត៖ អង្គការសហប្រជាជាតិគួររំឭករដ្ឋាភិបាលកម្ពុជាពីបញ្ហាបំណុល
5/6/2024
លោក អំ សំអាត នាយកប្រតិបត្តិអង្គការលីកាដូ បានលើកឡើងថា មានពលរដ្ឋខ្មែរចំនួន ១៦ម៉ឺននាក់បានលក់ដីដើម្បីដោះបំណុលនៅក្នុងចំណោមកម្ចីជាង២លានករណី។ នៅក្នុងបទសម្ភាសជាមួយវិទ្យុបារាំងអន្តរជាតិ RFI លោក អំ សំអាត ចាត់ទុកបញ្ហានេះថាជាការរំលោភសិទ្ធិមនុស្ស ដោយសារតែកូនបំណុលខ្លះត្រូវបង្ខំចិត្តឈប់រៀនទៅធ្វើការដើម្បីដោះបំណុល និងកាត់បន្ថយរបបអាហារប្រចាំថ្ងៃ។ នៅក្នុងន័យនេះ អង្គការលីកាដូ ទទូចឲ្យអង្គការសហប្រជាជាតិរំឭករដ្ឋាភិបាលកម្ពុជាពីបញ្ហាបំណុលនេះ ខណៈស្ថានភាពសិទិ្ធមនុស្សនៅកម្ពុជានឹងត្រូវលើកទៅត្រួតពិនិត្យនៅថ្ងៃទី៨ ខែឧសភា ឆ្នាំ២០២៤ ដោយក្រុមប្រឹក្សាសិទិ្ធមនុស្សអង្គការសហប្រជាជាតិ។
Duration:00:12:38
លោក ចាន់ យុត្ថា៖សីតុណ្ហភាពនឹងធ្លាក់ចុះ៥អង្សារសេពីកំដៅបច្ចុប្បន្នដែលមានជាង ៤០អង្សារសេ
5/3/2024
បន្ទាប់ពីខកខានឃើញទឹកភ្លៀងសូម្បីតែភ្លៀងកក់ខែអស់រយៈពេល៦ខែមក ទឹកភ្លៀងបានចាប់ផ្តើមធ្លាក់បណ្តើរៗនៅតាមតំបន់មួយចំនួនចាប់ពីថ្ងៃទី០៣ ខែឧសភា ឆ្នាំ២០២៤ នេះទៅ។ តែវាគ្រាន់ជាភ្លៀងកក់ខែប៉ុណ្ណោះ ខណៈរដូវវស្សាពិតប្រាកដនឹងឈានមកដល់នៅសប្តាហ៍ទី៤ នៃខែឧសភានេះ។ នៅក្នុងកិច្ចសម្ភាសជាមួយវិទ្យុបារាំង RFI នាថ្ងៃទី០៣ ខែឧសភានេះ លោក ចាន់ យុត្ថា អ្នកនាំពាក្យក្រសួងធនធានទឹក និងឧត្តុនិយមបានបញ្ជាក់ថា ដោយសារភ្លៀងចាប់ផ្តើមធ្លាក់រាយប៉ាយ សីតុណ្ហភាពអតិប្បរមានឹងធ្លាក់ចុះមកនៅចន្លោះពី៣៦ ទៅ ៣៨អង្សារសេ ចាប់ពីថ្ងៃទី០៥ ខែឧសភាខាងមុខ។
Duration:00:10:44
លោកប៉ាទ្រីក ម័រហ្វី៖ខ្ញុំគិតថាពលរដ្ឋខ្មែរនឹកដល់ស្ថាប័នព័ត៌មានឯករាជ្យដែលបានបិទចោលព្រោះជាប្រភពដ៏ល្អ
5/2/2024
ថ្ងៃទី ០៣ ឧសភាជាខួបលើកទី៣១នៃទិវាសេរីភាពសារព័ត៌មានពិភពលោក។ នៅក្នុងបទសម្ភាសជាមួយវិទ្យុបារាំងអន្តរជាតិ លោក ប៉ាទ្រីក ម័រហ្វី ឯកអគ្គរដ្ឋទូតអាមេរិកប្រចាំកម្ពុជាបានលើកឡើងពីសារៈសំខាន់ និងបញ្ហាប្រឈមនៃការប្រកបអាជីពសារព័ត៌មាន។ តែលោកកត់សម្គាល់ឃើញថា ស្ថានភាពសេរីភាពសារព័ត៌មាននៅកម្ពុជា និងនៅលើពិភពលោកកំពុងធ្លាក់ចុះ និងស្ថិតក្រោមការឡោមព័ទ្ធ។ សម្រាប់កម្ពុជា លោកប៉ាទ្រីក ម័រហ្វីបានមើលឃើញថា ការបិទស្ថាប័នសារព័ត៌មានឯករាជ្យមួយចំនួន ដូចជាសំឡេងប្រជាធិបតេយ្យ ឌឹខេមបូឌាដេលី និងវិទ្យុអាស៊ីសេរីបានឲ្យធ្វើឲ្យពលរដ្ឋមានការនឹកនា ព្រោះជាប្រភពព័ត៌មានដ៏ល្អ។ តាមលោកប៉ាទ្រីក ម័រហ្វី ការបើកលំហសេរីភាពសារព័ត៌មានជារឿងល្អសម្រាប់លទ្ធិប្រជាធិបតេយ្យដើម្បីឆ្លុះបញ្ចាំងពីទំនួលខុសត្រូវរបស់រដ្ឋាភិបាល។
Duration:00:09:20
លោកស្រី ឃួន វិច្ឆិកា៖ កម្ពុជាមិនទាន់ឈានដល់ការបិទសាលារៀនដោយសារតែការឡើងកម្តៅ
4/29/2024
ប្រឈមនឹងអាកាសធាតុដែលកំពុងឡើងកម្តៅខ្លាំង មានប្រទេសអាស៊ីមួយចំនួនបានសម្រេចបិទសាលារៀន។ នៅកម្ពុជា ក្រសួងអប់រំតាមរយៈអ្នកនាំពាក្យ លោកស្រី ឃួន វិច្ឆិកា បានបញ្ជាក់ពីការពិចារណាលើវិធានការដូចគ្នានេះ តែថាស្ថានភាពនៅកម្ពុជាមិនទាន់ឈានដល់កម្រិតនៃការបិទសាលារៀននៅឡើយទេ។ តាម លោកស្រី ឃួន វិច្ឆិកា ក្រសួងអប់រំ បានដាក់ចេញនូវវិធានការចាំបាច់ដូចជាឲ្យអ្នកពាក់ព័ន្ធរាយការណ៍ជាប្រចាំដើម្បីដឹងពីស្ថានភាពសិស្សនៅតាមសាលារៀនក្នុងគ្រាដែលអាកាសធាតុកំពុងតែឡើងកម្តៅ។ អ្នកនាំពាក្យក្រសួងអប់រំរូបនេះ ដដែលបានបន្ថែមថា ក្នុងករណីដែលសាលារៀនមិនអាចទប់ទល់នឹងស្ថានភាពកម្តៅបាន គឺត្រូវរាយការណ៍ជាបន្ទាន់ទៅមន្ទីរអប់រំនៅតាម រាជធានី និងខេត្ត។
Duration:00:08:03
លោក សុទ្ធ គឹមកុលមុនី៖ ប្រមុខរដ្ឋាភិបាលបញ្ជាឲ្យអង្គភាពគ្រោះមហន្តរាយអន្តរាគមន៍ទឹកដល់ពលរដ្ឋបន្ទាន់
4/26/2024
សីតុណ្ហភាពនៅក្នុងប្រទេសកម្ពុជានៅតែបន្តឡើងកំដៅខ្លាំងខុសពីឆ្នាំមុនៗ។ ស្ថានភាពនេះធ្វើឲ្យតំបន់មួយចំនួនប្រឈមនឹងគ្រោះរាំងស្ងួត និងកង្វះខាតទឹកសម្រាប់ប្រើប្រាស់ជាបណ្តើរៗ។ នៅក្នុងកិច្ចសម្ភាសជាមួយវិទ្យុបារាំងអន្តរជាតិ RFI នៅថ្ងៃទី២៦ ខែមេសា ឆ្នាំ២០២៤នេះ លោក សុទ្ធ គឹមកុលមុនី អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយបានឲ្យដឹងថាលោកនាយករដ្ឋមន្ត្រី ហ៊ុន ម៉ាណែត បានចេញបទបញ្ជានៅក្នុងកិច្ចប្រជុំគណៈរដ្ឋមន្ត្រីនាព្រឹកថ្ងៃសុក្រនេះ ឲ្យគណៈកម្មាធិការជាតិគ្រប់គ្រងគ្រោះមហន្តរាយដឹកនាំអន្តរាគមន៍ចំពោះការខ្វះខាតទឹករបស់ប្រជាពលរដ្ឋជាបន្ទាន់។
Duration:00:09:37
លោក ស៊ុន ចន្ធី៖ ការរំសាយបាតុកម្ម គឺដោយសារតែអាកាសធាតុក្តៅខ្លាំងពេក
4/22/2024
គណបក្សកម្លាំងជាតិបានធ្វើបាតុកម្មតែមួយព្រឹកថ្ងៃទី២២ ខែមេសានេះ រួចក៏រំសាយទៅវិញ ខណៈតាមគម្រោងត្រូវធ្វើចំនួន៣ថ្ងៃជាប់ៗគ្នាចាប់ពីថ្ងៃទី២២ ដល់ថ្ងៃទី២៤ ខែមេសា។ ក្នុងបទសម្ភាសជាមួយវិទ្យុបារាំងអន្តរជាតិ RFI លោក ស៊ុន ចន្ធី បានអះអាងថា ការរំសាយបាតុកម្មគឺដោយសារតែអាកាសធាតុក្តៅខ្លាំងពេក។ ទោះជាយ៉ាងណា ប្រធានគណបក្សកម្លាំងជាតិរូបនេះ នៅតែរក្សាជំហរទាមទារឲ្យដោះលែងសមាជិកជាន់ខ្ពស់២រូប គឺ លោក អ៊ុំ វីរ:រដ្ឋ និងលោក មឺ សេងហ៊ និងចង់ឃើញរដ្ឋាភិបាលមានយន្តការសម្របសម្រួលវិវាទនយោបាយនៅក្រៅប្រព័ន្ធតុលាការ៕
Duration:00:08:17
លោក ប៉ាត មុន្នី៖ គណបក្សជំនាន់ថ្មីនឹងគិតគូរអំពីលទ្ធិប្រជាធិបតេយ្យ និងការបង្រួបបង្រួម
4/19/2024
កាលពីថ្ងៃទី១២ ខែមេសាកន្លងទៅ ក្រសួងមហាផ្ទៃបានសម្រេចចុះឈ្មោះ «គណបក្សជំនាន់ថ្មី» នៅក្នុងបញ្ជីគណបក្សនយោបាយ។ នៅក្នុងកិច្ចសម្ភាសជាមួយវិទ្យុបារាំងអន្តរជាតិ RFI ក្នុងថ្ងៃសុក្រ ទី១៩ ខែមេសានេះ លោក ប៉ាត មុន្នី ស្ថាបនិកគណបក្សជំនាន់ថ្មីបានអះអាងថា ការបង្កើតគណបក្សជំនាន់ថ្មីនេះឡើង គឺដើម្បីឆ្លើយតបទៅនឹងបំណងរបស់ប្រជាពលរដ្ឋដែលចង់បាននូវលទ្ធិប្រជាធិបតេយ្យ និងការបង្រួបបង្រួមពិតប្រាកដ។ តាមស្ថាបនិកគណបក្សរូបនេះដដែល ធនធានសម្រាប់ដំណើរការគណបក្សគឺបានមកពីការចូលរួមពីសំណាក់សមាជិក និងការគាំទ្រពីប្រជាពលរដ្ឋ៕
Duration:00:10:56
លោក ចាន់ យុត្ថា៖ អាកាសធាតុបន្តឡើងកម្តៅខ្លាំងអំឡុងចូលឆ្នាំខ្មែរខាងមុខ
4/9/2024
សីតុណ្ហភាពអតិបរមាក្នុងប្រទេសកម្ពុជានៅរដូវប្រាំងនេះ បានកើនឡើងពី៣៩ រហូតដល់ជាង៤០អង្សារសេ។ អាកាសធាតុក្តៅបែបនេះ នៅតែបន្តកើតមានរហូតដល់បុណ្យចូលឆ្នាំប្រពៃណីជាតិខ្មែរ ដែលនឹងប្រព្រឹត្តទៅ នៅចុងសប្តាហ៍នេះ និងដើមសប្តាហ៍ក្រោយ។ ទោះយ៉ាងណា នៅមិនទាន់មាននរណាម្នាក់រងគ្រោះ ឬការប្រឈមនឹងគ្រោះរាំងស្ងួតធ្ងន់ធ្ងរ ដោយសារតែរលកកំដៅដ៏ខ្ពស់នៅខែមេសានេះនៅឡើយ។ នៅក្នុងបទសម្ភាសជាមួយវិទ្យុបារាំងអន្តរជាតិ RFI នាថ្ងៃអង្គារ ទី០៩ ខែមេសានេះ លោក ចាន់ យុត្ថា អ្នកនាំពាក្យក្រសួងធនធានទឹក និងឧត្តុនិយមបានថ្លែងថាការទទួលរងឥទ្ធិពលនៃរលកកំដៅដ៏ខ្ពស់នេះ មិនមែនមានតែកម្ពុជាទេ ពោលប្រទេសជាច្រើននៅក្នុងតំបន់អាស៊ី និងអឺរ៉ុបក៏កំពុងរងការឡើងកម្តៅផងដែរ។
Duration:00:13:16
លោក វិចទ័រ ហ្សូនា៖ កម្ពុជាមានលទ្ធភាពផ្គត់ផ្គង់អគ្គិសនីគ្រប់គ្រាន់នៅរដូវក្តៅនេះ
4/8/2024
អ្នកជំនាញខាងថាមពល អះអាងថា នៅរដូវក្តៅនេះ កម្ពុជាមានលទ្ធភាពផ្គត់ផ្គង់អគ្គិសនីបានគ្រប់គ្រាន់ ខណៈតម្រូវការប្រើប្រាស់កើនឡើង៣០%។ ក្នុងបទសម្ភាសជាមួយវិទ្យុបារាំងអន្តរជាតិ RFI អនុរដ្ឋលេខាធិការ ក្រសួងរ៉ែ និងថាមពល លោក វិចទ័រ ហ្សូនា បញ្ជាក់ថា រោងចក្រផលិតអគ្គិសនីដោយប្រើប្រេងខ្មៅ នៅខេត្តកណ្តាលនឹងផលិតអគ្គិសនីដើម្បីបំពេញចន្លោះខ្វះខាត។ បើតាមអនុរដ្ឋលេខាធិការ ក្រសួងរ៉ែ និងថាមពល កម្ពុជាមានលទ្ធភាពផលិតអគ្គិសនីខ្លួនឯងបាន៧៥% ពោលគឺត្រូវការទិញពីប្រទេសជិតខាងតែ២៥%ប៉ុណ្ណោះ ខណៈកម្ពុជាក៏មានគម្រោងលក់អគ្គិសនីទៅឲ្យសិង្ហបុរីនៅពេលខាងមុខ។
Duration:00:09:07
លោកគង់ មុនីកា៖បោះឆ្នោតឲ្យលោក ហ៊ុន សែនធ្វើប្រធានព្រឹទ្ធសភាជាការបត់បែនតាមស្ថានការណ៍នយោបាយ
4/5/2024
ភ្ញៀវរបស់វិទ្យុបារាំងអន្តរជាតិ RFI នៅថ្ងៃទី០៥ មេសានេះ គឺលោកគង់ មុនីកា សមាជិកព្រឹទ្ធសភាមកពីគណបក្សឆន្ទៈខ្មែរដែលទទួលបាន ៣អសនៈនៅក្នុងព្រឹទ្ធសភានីតិកាលទី៥។ នៅក្នុងសម័យប្រជុំដំបូង កាលពីថ្ងៃទី០៣ មេសា សមាជិកព្រឹទ្ធសភាទាំង៦២រូបបានបោះឆ្នោតគាំទ្រជាឯកច្ឆ័នឲ្យលោកហ៊ុន សែនធ្វើជាប្រធានព្រឹទ្ធសភា។ ក្នុងសំឡេងគាំទ្រក៏មាន ៣សំឡេងជារបស់គណបក្សឆន្ទៈខ្មែរ។ ការណ៍នេះបានញ៉ាំងឲ្យអ្នកគាំទ្រគណបក្សឆន្ទៈខ្មែរសម្តែងការមិនពេញចិត្ត ពិសេសអង្គបោះឆ្នោត។ លោកគង់ មុនីកាបានទទួលស្គាល់ពីក្តីបារម្ភរបស់អង្គបោះឆ្នោត និងថា ការបោះឆ្នោតគាំទ្រលោក ហ៊ុន សែនជាការបត់បែនតាមស្ថានការណ៍នយោបាយជាក់ស្តែង។ តាមលោក គង់ មុនីកា វាគ្រាន់ជាការផ្លាស់ប្តូរយុទ្ធវិធីរបស់បក្សឆន្ទៈខ្មែរប៉ុណ្ណោះ។
Duration:00:10:24
លោក ចាន់ សារិន៖កុមារអូទីស្សឹមកម្ពុជាយ៉ាងតិច២០០នាក់កំពុងរង់ចាំទទួលការអប់រំពិសេស
4/3/2024
ថ្ងៃទី២មេសាជាទិវាយល់ដឹងពីអូទីស្សឹមពិភពលោកដែលត្រូវបានប្រារព្ធធ្វើឡើងនៅប្រទេសកម្ពុជាចាប់ពីឆ្នាំ២០១៥មក។ ក្នុងបទសម្ភាសជាមួយវិទ្យុបារាំងអន្តរជាតិRFI នៅថ្ងៃទី៣មេសានេះ លោក ចាន់ សារិន នាយកវិទ្យាល័យអប់រំពិសេសក្រុងតាខ្មៅ និងជាប្រធានបណ្តាញអូទីស្សឹមកម្ពុជាសង្កេតឃើញថា បញ្ហាអូទីហ្សឹមត្រូវបានបញ្ច្រាបឱ្យពលរដ្ឋខ្មែរបានយល់ដឹងយ៉ាងទូលំទូលាយ ក្នុងរយៈពេលចុងក្រោយនេះ។ យ៉ាងណាមិញ ចំពោះលោក ចាន់ សារិន បញ្ហាអូទីស្សឹមនៅកម្ពុជានៅតែជាក្តីបារម្ភ ព្រោះថាកម្ពុជាមិនមាន អ្នកជំនាញខាងវិភាគវិនិច្ឆ័យនិងព្យាបាលអូទីស្សឹមគ្រប់គ្រាន់។ បើតាមលោក ចាន់ សារិន គ្រឹះស្ថានអប់រំពិសេសសម្រាប់កុមារមានអូទីស្សឹមនៅមិនទាន់គ្រប់គ្រាន់តាមតម្រូវការ ខណៈនៅកម្ពុជា កុមារអូទីស្សឹមយ៉ាងហោច២០០នាក់ កំពុងរង់ចាំទទួលបានការអប់រំពិសេស៕
Duration:00:13:48