Ligwalagwala FM Current Affairs

Babuyiselwe esitokisini basolwa lababili lebaboshelwe kubulala Lusanda Mathabela, lobekaneminyaka lelishumi nemfica budzala. Lomunye walabasolwa kutsiwa besekahlukene naLusanda. Kuva kutsi kwentekeni, sikhulumisana nalokhulumela umndeni wakaMathabela, longange-Mnumzane Ali Sibiya.

Licembu lebasubatsi lalapha eMbombela kulesifundza seMpumalanga iBellas Athletics Club isukumise umkhankaso wekuhamba noma kugijima emakhilomitha l;asemkhatsini kwalasiholanu nalalishumi njengendlela yekuvakalisa kukhala ngekubulawa ngesihluku kwa-Lusanda Mathabela. Mathabela, lobekaneminyaka lelishumi nemfica kusolwa kutsi ubulewe ngulobeksingani sakhe naso lebesineminyaka leli-19 kanye nemngani waso. Labasolwa lababili babuyiselwe esitokisini ngemuva kwekuvela enkantolo ngasekucaleni kwaleliviki. Kutfola kabanti ngalomkhankaso wekugijima nekuhamba, sichumana nasihlalo weBellas Athletics Club, Patrick Ntimane

Sekusele emalanga lambalwa kutsi kubanjwe inkomfa letawubonisana ngetindzaba tekugucugucuka kwesimo selitulu yelihlandla lemashumi lamatsatfu (COP30), letawubanjelwa e Brazil. Nanobe kunjalo, labanye bacwaningi batsi tinkinga letikhungetse lelive letifaka ekhatsi kuswelakala kwematfuba emsebenti, bugebengu netenhlalo tenta kube matima kutsi lusha litibandzakanye etindzabeni letimayelana nekugucugucuka kwesimo selitulu. Simeme sati ngetemvelo lesingumcondzisi weMatome Group, Ncedile Dlakude kutotfola kutsi lusha lungasondzetwa njani etindzabeni tekugucugucuka kwesimo selitulu

Inhlangano i MK Party seyimemetele ngekumisa lisekela lemengameli wayo nalophindze abe ngumholi walenhlangano ephalamende, Dr. John Hlophe. Kubikwa kutsi lesincumo sitsetfwe ngumengameli walenhlangano mnumzane Jacob Zuma ngekubambisana nebuholi lobusetulu balenhlangano. Kuyibuka ngeliso lemhlatiyi lendzaba, simeme solwati wetindzaba tepolitiki Prof Bheki Mngomezulu.

Tibalo takamuva letikhishwe baka Stats SA tiveta kutsi lenyukile linani lebantfwana labakhulelwa basesebancane. Letibalo tikhombisa kutsi emkhatsini wa January nyakenye kanye na February lonyaka, kubelekiswe bantfwana labangu-123 000 labaneminyaka lesuka kulengu-19 budzala kuya phasi, lebafaka ekhatsi labangu- 2 108 lebaneminyaka lelishumi kuya kulelishumi nakune budzala. Kukhuluma kabanti ngalesimo simeme Umphatsi weligumbi lelifundzisa bantfwana ngetemphilo ngaphansi kwelitiko letemphilo eMpumalanga, Make Dudu Shabangu.

Ndvunankhulu walesifundza seMpumalanga Mandla Ndlovu utawubamba umhlangano nalabo labayincenye yemkhandlu wesifundza lolwa nebudlovu lobuyamene nebulili kanye nekubulawa kwebantfu labasikati i-Council on Gender-Based Violence and Femicide (GBVF). Kuva kabanti ngaloku asemukele Mandy Malope loyi-Technical Monitor ye-GBVF kulesifundza se-Mpumalanga

Litiko letekuchumana netebucwepheshe libambe inkomfa lebuka tindlela tekulwa nebugebengu lobentiwa ngetebuchwepheshe, leseyingena elangeni lesitsatfu eThekwini namuhla. Kubuka lokwenteka kulengcungcutsela sikhulumisana neChief Information Security Officer, Doreen Mokoena.

Likomishana lemalungelo eluntfu belihlangene netinhlaka letahlukene eNshonalanga Kapa kutewubonisana ngemtselela wemagenge (gangsterism) emphakatsini. Kubuka kutsi kuhambe njani futsi lingenelela njani lelikhomishana, sicocisana naNkomishana Asenza Gungubele

Namuhla lilanga lekuchushisa ngesifo samalaleveva kulesigodzi seSADeC. Litiko letemphilo kulelive litsi bacishe babe tinkulungwane letine bantfu lebalashelwa lesifo samalaleveva kumnyaka timali wanga- 2024/2025. Ngekusho kwalelitiko letibalo tikhombisa kwehla naticatsaniswa naseminyakeni leyandvulela lena. Kukhuluma kabanti ngaloludzaba simeme umphatsi weligumbi lelilwa namalaleveva, Umnumzane Bonginkosi Gungu

Libamba lendvuna yelitiko lemaphoyisa Firoz Cachalia utsi ngekubona kwakhe lomhlangano nebetindzaba waNkomishana wemaphoyisa KwaZulu Natal Nhlanhla Mkhwanazi ngaKholwane bewungakafaneli. Cachalia abevele phambi kwekomiti yesikhashane ePhalamende lephenya ngetinsolo tekuphepha kwelive. Kuhlatiya lobufakazi ba Cachalia sikhulumisana nasolwati ngetindzaba tebugebengu Dkt Mxolisi Mathebula ........

Inkantolo lenkhulu eGauteng iyale masipala waseJozi kutsi anonophise luhlelo lwekutfola imininingwane yabo bonkhe labantfu labatsengisa emgwacweni. Loku kuta ngemuva kwekutsi i-Socio-Economic Right Institute (SERI), imikiseke lomasipala enkantolo mayelana nekususwa kwalabantfu labaphila ngekutsengisa emgwacweni yase-Jozi. Simeme mabhalane we-South African Informal Traders Forum kutewukhuluma ngal;endzaba.

Inhlangano iMK Party seyimemetele kutsi icoke Des van Rooyen njengasosiswebhu lomusha walenhlangano ephalamende. Lesikhundla besiphetfwe nguCollen Makhubele. Sicocisana nemhleli wetindzaba tepolitiki khona lapha kaSABC, Mzwandile Mbetje.

Sicele umhlatiyi wetembangave Umumzane Thamsanqa Malinga kutewubuka lomsindvo losuke emkhatsini wetinhlangano tepolitiki esifundzeni saKwaZulu Natal. I MK Party seyetfule siphakamiso sekungametsembi Ndvunankhulu Thami Ntuli ngemuva kwekutsi iNFP ibite iIFP kutsi ihocise Ntuli njengeNdvunankhulu wesifundza.

Mengameli Cyril Ramaphosa uphindze wabuyelisela Umnumzane Mosotho Moepya esikhundleni sasihlalo welikhomisha lelukhetfo i IEC. Mengameli uphindze uphindze wacoka nalabanye bonkhomishana balelikhomishana lebatawusebentela iIEC. Kuyibuka lendzaba simeme umhlatiyi wetepolitiki, Prof Ntsikelelo Breakfast.

Njengobe titintsatfu enyangeni ye Lweti namuhla indvuna lebuke tindzaba tabomake, lusha kanye nalabakhubatekile ehhovisi lemengameli, Sindisiwe Chikunga, beketfula inyanga yekufundzisa ngemalungelo ebantfu labakhubatekile. Sicubulo salonyaka sigcile kakhulu ekucinisekiseni kutsi yonkhe imikhakha isebenta ngekubambisana kuze nalabakhubatekile badlale indzima kuyo yonkhe imikhakha yetemnotfo. Kubuka kutsi lesifundza seMpumalanga sitabe sinatiphi tinhlelo kulenyanga simeme, Umnumzane Du Toit Nkambule lovela egunjini lebantfu labakhubatekile ehhovisi landvunankhulu kulesifundza..

Likhomishana laMadlangan belilalele bufakazi ba Lt-General Patrick Mbotho longulomunye webaphatsi bema-Hawks ngaloku lokwenteka nakutseleka emaphoyisa emtini waKatiso Molefe ngenyanga yeNgongoni kulomnyaka lophelile. Kuhlatiya lobufakazi sikhulumisana nasolwati wetindzaba tebugebengu Andy Mashaile.

Tinkulungwane tetisebenti letivela kulo lonkhe lakuleli betiyicenye yemashi lebeyiholwa yi-nyonyana yetisebenti iMaanda Ashu Workers Union of South Africa (MAWUSA),ePitoli. Letisebenti letingephansi kweluhlelo lwe-EPWP titsi tifuna bulungiswa, kukhokhelwe kahle kanye nekunakekelwa ngendlela lefanele. Kukhuluma ngalendzaba sicocisana nemhlelembisi wavelonkhe wenyonyana yetisebenti i-Maanda Ashu Workers Union of South Africa (MAWUSA), Cedric Chauke.

Liphalamende belibambe umcimbi wekutfulwa kabusha kwesigungu lesitawubukana nesifo sesifuba, iSouth Africa TB Caucus. Lokwetfulwa kabusha kwalesigungu kwentiwe ngekubambisana nelitiko letemphilo velonkhe kanye nemkhandlu lolwa nekwandza kwesandvulelangculazi iSouth African National Aids Council (SANAC). Sicocisana nenhloko yetekuchumana kuSANAC, Nelson Dlamini.

Seyiphotfuliwe lengcungcutsela yemalanga lamatsatfu lebeyimayelana nekugucugucuka kwesimo selitulu kanye netindlela tekumelana netinhlekelele lebeyibanjelwe e Windhoek kulase-Namibia. Kutfola kabanti kutsi lekuphunywe nani kulengcungcutsela sichumana namcwaningi ngekugucugucuka kwesimo selitulu lophindze abe ngumetfuli wetifundvo te-Communication and Media, University of Johannesburg, Dr Sanele Gamede.

Mengameli we-National Freedom Party (NFP) Ivan Barnes ufuna kutsi inhlangano ye-IFP ihocise Ndvunankhulu wesifundza saKwaZulu Natal Thami Ntuli. I NFP iyso nayitawqehluleka iIFP kutsatsa lesincumo, kutayiphocelela kutsi icubungule kuhlanganyela kwayo kuhulumende wekubusa ngekubambisana kulesasifundza. Lenhlangano isola Ntuli ngekwehlulaka kutsatsela tinyatselo baphatsiswa labasolwa ngenkhohlakalo kulohulumende wesifundza. Kubuka kutsi ingabe kusho kutsini loku, sicele umhlatiyi wetembangave Umnumzane Thami Malinga.