Fittaish Podcast

شهر فخر سعيد لكلّ الكويريات والكويريين* 🌈! رح نحتفل معكن بهي الحلقة بفيلم مميّز هو "في الظّل". فيلم وثائقي تونسي مُنع من العرض بكلّ البلدان العربية وبتونس، بسبب تبنّيه لقضية المثليين*. الفيلم الرابح على الجائزة البرونزية لأفضل وثائقي طويل كان بوّابة لعالمهم داخل المجتمع العربي، وين فينا نشوف كيف الكره اللي معندوش مبرّر ينجّم يدمّر و يوجّع. الفيلم يحمل برشا قضايا مسكوت عنها بدخوله لحياة كل من أمينة، ساندرا، عواطف، رامي وأيوب؛ شلّة من الأقلّيات الجنسيّة اللي تجمّعوا في بيت واحد. الشّلة هاذي بتحمل جروح الكره من جهة، و برشا حب، وعطف وأمل للحياة من جهة أخرى. بنتمنّالكن استماع لطيف 💙

تخيّلوا أنكن تعرفوا من أوّل يوم بحياتكن، بأيّ يوم رح تموتوا. كيف رح تعيشوا حياتكن؟ بتقتلوا حالكن بالحياة؟ بتعيشوا بنفس الشغف والأمل؟ ولا رح تشكّوا بهاد اليوم وتنكروه؟ بفلم اليوم رح نشوف حدا عاش التجربة هي.. هو وكلّ اللي حواليه مؤمنين أنّه رح يموت بسنّ العشرين. فلمنا هو: ستموت في العشرين. حلقتنا اليوم "الشيخ ما بيكذب" بتسلّط الضو على شريحة من المجتمع السوداني، اللي عم يشهد اليوم أحداث سياسية كبيرة، وبتخلينا نفهم شوي تركيبة هاد المجتمع الغائب نسبياً عن الساحة العامة. بنتمنّالكن استماع لطيف Instagram

عمالة الجنس هي مهنة انوجدت بكل حضارة على وجه الأرض، تُعرف اصطلاحاً بالدعارة. وهي تقديم خدمات جنسية بمقابل مادّي. أُطلق مصطلح العامل بالجنس عام 1978 من قبل الناشطة كارول لي، وهي عاملة جنس تم اغتصابها من قبل شخصين. بتوصف كارول حادثة الاغتصاب إنها اللحظة الحاسمة بحياتها اللي دفعتها للنضال من أجل حقوق العاملات* بالجنس. أمّا بالنسبة لديفد، ضيفنا اليوم، الموضوع مو متعلّق بالاغتصاب الجسدي؛ إنّما بما وصفه بالاغتصاب النفسي. بدأ من اللحظة اللي جبرته فيها ظروف الغربة والقهر إلى الاتجاه نحو عمالة الجنس، المهنة الموصومة بالعار ضمن مجتمعاتنا بما فيها مجتمع الميم عين+. ديفيد بيقاوم هي الوصمة بالسخرية، والضحكة اللطيفة، والنكات المستمرة على المواقف المؤذية يلي بيتعرّض إلها. بنتمنّالكم استماع لطيف 🌈

بالحلقة التانية من بودكاسات فتّيش رح تكون معكن أميمة لتاخدكن برحلة سمعية لفيلم "سكر بنات 2007" من إخراج وبطولة نادين لبكي. الفيلم اللي تناول قضايا كتيرة شائكة كانت تعتبر تابوهات بتحاصر النساء والرجال غير المعياريين* بمجتمعاتنا وما زالت لحدّ اليوم؛ متل حرية الجسد، الأدوار الجندرية والقيود الاجتماعية المفروضة على النساء. بنتمنّالكن استماع حلو 💙

📽️✨ الموسم الثاني من بودكاست فتّيش رح يكون حامل تغيير، وإضافة جديدة للمحتوى اللي عم نشاركه معكن. أميمة اللي اسمعتوها وحبيتوها بفقرتها الصغيرة بالموسم الأول، رجعتلكن من جديد بموسم خاص، بالموسم التاني من بودكاست فتّيش لتكون معكن بشكل جديد تماماً. "الأفلام هي انعكاس للمجتمع وفي أغلب الأوقات هي المراية اللي تكشف المستور، المسموح والمحظور، هي اللّي تكسّر التابوهات وتفتح الأبواب. الأفلام هي بوق النّاس اللّي بلا حقوق و فيها تكون أحسن صديق تواجه بيه وحش الوحدة". عن الموسم التاني من بودكاست فتّيش بتقول أميمة زاين، "باش نحكي عالأفلام. باش نعطيكم عيني تشوفوا بيها، ونعطيكم فرصة تسرحوا معايا". وبالحلقة الأولى رح تحكي لنا عن رؤيتها لواحد من الأفلام العربية المأخود عن رواية بتحمل نفس الاسم، (هيبتا). اسمعوا الحلقة واستمتعوا بالفيلم واسمعوه كأنكم عم تشوفوه.

بالحلقة الاخيرة من الموسم الأوّل من بودكاست فتّيش رح يكون معكن مروان هالمرّة بدون ضيف*. ورح يحكيلنا عن تجربته بالسنة الماضية كمقدّم للبودكاست، عن قصته كشخص كويري، ورح يجاوب عَ كلّ أسئلتكن.. وشغلات تانية حابب يشاركها معكن. رح تسمعوا كمان لمحة عن تطوّر فتّيش من بودكاست لمبادرة تطوّعية متكاملة، وتتعرّفوا عَ فريقنا أكتر، وشو خططنا للموسم التاني. رح تكون معكن أميمة ببودكاست جديد كلّياً. بالإضافة لفقرات جديدة مع فنّانين* كويريين، لندخل بشكل أعمق بالمجتمع الكويري الناطق بالعربي. مروان رح يودّعكن بالموسم القادم، بس راجعلكن بعده بقوّة وحرفية أكتر وأفكار جديدة وشغل مهمّ. بنتمنالكن استماع جميل. 🌈

الحاجات الفيزيولوجيّة اللي هي: التّنفس، المأوى، الغذاء، الجنس، بحسب أبراهام ماسلو، موجودة بقاعدة هرم ماسلو للاحتياجات الإنسانية. اللّغة العربيّة بتعرّف الحاجة حسب المعجم الوجيز: كلّ ما افتقر إليه المرء وطلبه. في 1% من سكان الكرة الأرضيّة ما بيعتبروا الجنس حاجة بالنسبة إلهم، همّ اللاجنسيين*. أنّك ما تقدري تنجذبي جسدياً لأشخاص إلّا إذا في رابط رومانسي، أو أنّك تستمتع بالإمتاع الذاتي ولكن ما بتثيرك العلاقة الجنسية مع شريك* جنسي*... أو أنّك تشتهي الجنس الناعم والحميمية بدون ما تشتهي الإدخال، كل هدول هنن تفضيلات بتندرج تحت اللاجنسية. الفئة اللي رح تخبّرنا عنها ضيفتنا (جي) من خلال سرد لعدّة أحداث وتجارب شخصيّة، لنتعرّف أكتر على هاد الطيف الواسع من اللاجنسية وعن إضافة حرف اللام لتسمية مجتمع الميم عين. بنتمنّالكم استماع لطيف. 🌈

الهويّة حسب تعريف الفلسفة هي حقيقة الإنسان المطلقة، بمعنى إنها مجموعة صفات بيعرّف فيها الإنسان عن ذاته، سواء معنوية أو جسدية. أنثى، ذكر، عربية، أشقر، سمراء، أمور ما بنختارها، ولكن تعبيرنا عنها، هو تعبيرنا عن هويّتنا اللي عندنا كامل الحقّ لاكتشافها وعيشها بحرّية ومساواة. للأسف هاد الحق ما بيكون متاح للجميع بنفس الدرجة، وأكثر الأشخاص معاناةً بتحصيله هم اللي عندهم هويّة جندريّة غير معياريّة بالنسبة للمجتمع. أنّك تولدي أنثى وتحسّي حالك ذكر أو العكس، هو شي بيعاقبك عليه المجتمع، وممكن يحوّل جسدك لسجن، ضيق وموحش، وأحياناً الأهل هم حرّاسه. ضيفنا آدم (هيك بيقول المجتمع)، ضيفتنا دينا (هيك بتعرّف عن حالها) أنثى، عراقية، بتحكيلنا عن تجربتها مع سجن الهويّة ونضالها للتحرّر منه. بنتمنّالكم* حلقة ممتعة. 🌈

ـ بسبب الرفض المجتمعي والديني اللي بيتعرضوا إله الكويريين* بحياتهم* اليومية، كتار بيكونوا مُجبرين* يخلقوا حياة مزدوجة لأنفسهم*. سواء ليحافظوا على علاقاتهم* مع العائلة والأصدقاء، أو بسبب حاجتهم* المستمرّة للأهل ولفرص العمل اللي بكتير أوقات بتتأثّر بكونهم* كويريين*. صحيح إنّه خلق شخصية أخرى بترضي المجتمع يعتبر الخيار الأسهل، لكن بنفس الوقت إله آثاره السلبية العديدة على نفسية الإنسان. ـ ضيفنا اليوم، أنس من سوريا، بيحكيلنا رحلته للخروج من الخزانة، كيف قدر يتعامل مع أهله، وكيف بينظر للموضوع.. بحلقة مميزة موجّهة لأهالي مجتمع الميم عين+ قبل الكويريين أنفسهم*. بنتمنّالكم* استماع لطيف 🌈

في سنوات الطفولة والمراهقة من حياتنا، نكبر في مجتمع مليء بالقوالب الجامدة التي تحدّد تعريفنا للذكورة والأنوثة. فطريقة المشي والكلام والتعبير عن المشاعر…إلخ، كلّها محكومة بنظام جندري موروث لا يدع مجالاً لنا كأفراد لننمو على سجيّتنا. وهذا ما يضطرّنا، بعد فهمنا لتعقيدات الجندر والجنسانية، لسنوات عديدة لنستعيد علاقتنا بأنفسنا وثقتنا بها. مفهوم الخروج من الخزانة وتأثيره على علاقة الإنسان بجسده، دور الاستعمار الغربي في ترسيخ رهاب التنوّع الذي نعاني منّه في مجتماعتنا العربية، أمور ناقشناها أيضاً في حلقتنا اليوم مع ضيفنا رشيد من سوريا، نتمنّى لكم استماعاً لطيفاً 🌈

الجمال، الجنس، الجسد والغرائز هي مفاهيم تتباين في فهمها والتعامل معها كل المجتمعات في العالم. ولكنها في مجتمعاتنا العربية، لا تزال مواضيع خاضعة لأحكام أخلاقية جمعية، تجعل الحديث عنها أو حتى التفكير بها، يبدو أمراً معيباً. فبين التحريم والإباحة تبقى التجربة الجنسية إحدى الحاجات الأساسية في حياة كلّ منّا. وفي رحلة اكتشافنا لجنسانيّتنا، تتجلى جوانب أخرى من أنفسنا، وتتطوّر علاقتنا مع أجسادنا، ويزداد وعينا بالآخرين. ضيف حلقتنا اليوم، تازر من ليبيا، الكاتب والصحفي الكويري، يحدّثنا عن تحوّل مفهمومه عن التنوّع الجمالي والجنس، من فلسفة "إماتة الجسد وإحياء الروح" إلى "مذهب اللذّة والانفتاح". 🌈

كلنا كَبشر منجي على هالعالم وعندنا أقدار محدّدة مسبقاً حسب وين وبأيّ زمن عمننولد.. بتستقبلنا العيلة والمجتمع وتقاليدهم وبتحطنا بقوالب جاهزة، ونحنا كلما منكبر منتحرّر منها أكتر. ولكن تكوينة الإنسان ما بتلعب فيها إلّا الطبيعة والصدفة اللي بيختاروا بأيّ جينات الانسان رح ينولد. هون منشوف، انّو أوقات حتّى الطبيعة بتخلقنا بالجسم الغلط.. متل ما بيصير مع العابرين والعابرات جندرياً حول العالم؛ الشي اللي بيتطلّب منهم شجاعة هائلة لاكتشاف وتصويب هاد الخطأ. ضيفتي ياسمين رح تحكيلنا اليوم عن تحدّياتها اليومية كعابرة جندرياً وعن خطوات عملية التصحيح الجنسي اللي بيمرّ فيها معظم العابرين جندرياً حول العالم. 🌈

أغلب الناس بتعتقد انّو الإنسان بيولد بأحد الجنسين؛ إمّا ذكر أو أنثى. لكن لمّا بدنا نحكي عن الواقع، أو عن الأجناس اللي قدر الطب والعلم يرصدها؛ هون بيصير فينا نحكي عن أكتر من احتمالين. إلى جانب الجنس (البيولوجي) هناك ما يدعى بالجندر.. أو بكلمات بسيطة: الإحساس الجنسي الذاتي أو الدور الاجتماعي الجنسي للفرد، بمعزل عن جنسو البيولوجي. اسمعوا ضيف حلقتنا لليوم غيس، عميحكيلنا عن تجربتو الشخصية كشخص لاثنائي (نَن-باينري).. وعن تحدّياتو بمجتمع بيفرض عليه كل الوقت أنماط ذكرية ما بتشبهو. 🌈

"كتير عالم بتشوف انّو الدولة العربية الأكثر تحرّراً واستقبالاً للمثلية الجنسية هي لبنان.. يؤسفني قول انّو هيدا الشي مش مزبوط." بهالكلمات بلّش ضيفا اليوم كلامو عن شكل مجتمع الميم عين بلبنان. بهالحلقة رح تسمعوا پول، الناشط السياسي الكويري اللبناني عميحكي عن نظرة المجتمع اللبناني للكوير كوميونتي و"عقوبة المثلية الجنسية" بلبنان، وعن الطابع النسوي الكويري لثورة 17 تشرين.. وكيف غيّرت الثورة حياتو وعملت منو شخص تاني تماماً. منتمنالكن استماع لطيف. 🌈

أهلا وسهلا فيكن بالحلقة الأولى من بودكاست فتّيش. ضيفنا اليوم صديق رايق كتير.. حبّينا نحكي سوا عن تجربتو الشخصية كمثلي ونظرتو الذاتية لكتير مواضيع بتخصّ مجتمع الميم عين. من الآوتنغ أمام العيلة، لشو تغيّر بتجربتو الجنسية بالغربة، لكيف قدر يحلّ أزمة الدين لصالح حرّيتو الجنسية… هي وغيرا من المواضيع حكينا فيها بمقابلة كانت أقرب لتبادل أفكار عفوي. منتمنالكن استماع لذيذ. 🌈

بودكاست فتّيش هو منصّة صوتية ومكان آمن انخلق لنحكي مع بعض ونسمع من بعض تجارب كويرية مننا وفينا رح نستضيف بشكل أساسي أشخاص كوير من كل أطياف مجتمع الميم عين، بالإضافة لأي حدا حابب* يحكي* معنا كويرنس كما أنو مبادرة لنعطي الكوير الناطقين بالعربي مساحة حرّة للتعبير، وللعالم اللي بتجهل طبيعتنا الفرصة انها تسمعنا وتتعرف علينا 🌈