Al Tawrat (enseignement en langue Malinke)

Niŋ Ala soŋta, ñaa to, nn se doo joki karaŋo lee la. Bari, jaŋ niŋ n xa woo ke, ilu se tuu karaŋ xotoolu lamee la, fo ilu sa a faamuyaa. Xa a faamuyaa kende

Kabiriŋ Ala xa duniyaa daa luŋ meŋ, fo bii kuw sii maŋ ke Ala maŋ meŋ bo a xalama. Bari, woo doroŋ te, kuw sii maŋ ke, ate maŋ soŋ meŋ ma fanaŋ. Woo maŋ ke, xo a be moxoo la jaxuyaa fee. Ayi! Woo te, baawoo, a se moxoo tuu ŋanneyaa taa la, bari haali woo tumoo, a be moxoo la kuw jaxoolu kontrole xaŋ nee mene...Woo ñaa ma, niŋ nn xa duniyaa la taaraxoo lasaxaa, xa Ala la xuma safeliŋo fanaŋ nasaxa, nn se doo kafu nn na famuyaa la Ala la kuwo to, bari xodi, nn se haadamadiŋo la jaxuyaa fanaŋ je a to fanaŋ.

Kabiriŋ Ala soxota a fo la, xo sabu ñimmaa doo be naa la, xa bo musoo lee siyo to, meŋ be Nbilisa fangoo baŋ na, a tuuta a la gullo ba woo mawura la. Dondiŋ dondiŋ, a xa a mawuura, fo a daafaata luŋ meŋ, nn sa a loŋ tigi tigi, xoo woo lee mu a daafaaliŋo ti.

Ala xoo, xo a be xambeŋ kutoo ke la, baawoo haadamadiŋo xa xambeŋ foloo tiñaa. Xa tara, xambeŋ kutoo xa fiisa xambeŋ foloo ti, baawoo xambeŋ kutoo te deŋdiŋ haadamadiŋo la tambi siloo xaŋ ñaa sii ma, a be dendiŋ Ala kiliŋ na tiliŋo lee xaŋ. A teŋma, a se beŋ kuw soobe, baawoo haadamadiŋo la tiliŋbaliyaa miya tiñaa noo.

Ala la gullo baa mu gullo meŋ ti, ni i fakiliŋ ta a kuu, nn maamaalu xa a soosoo luŋ meŋ, a xo ii yeŋ, xo ate faŋo, Ala, xo ate faŋo lee be Haadamadiŋolu labo la kiitoo xoto, meŋ be xaŋdiŋ. Bari, a maŋ a ke ñaa fo woo tumoo; a xa woo laafidoo taa doroŋ, xa a ke ñaa mawuura dondiŋ. Awa. Kabiriŋ woo tumoo, fo a xa a la xumoo woo daafaa luŋ meŋ, a tuuta a mawuura la. I sa a tara, a xa a la laafidoo woo mawuura tuguŋ Anabi Sekari bulu la. Ilaŋ nn xa a mee, a xa a mawuura ñaa meŋna la.

Awa. Ala xa meŋ fo a la kiilaalu daa la, woo keta. Yahudiyalu maŋ soŋ kiilaalu lamee la, bari Ala xa feŋ feŋ fo, a bee keta. Babiloni jamanoo naata, xa Serusalemu manoo, xa jee moxoolu laduŋ joŋyaa to. Bari, sanjiy bii worowula woo keliŋo xoo la, Ala xa a ke, ii xi ii lasaagi tuguŋ, xa Serusalemu laloo.

Ala boyita a la gullo ba mawuura la nn maamaa Haadamalu yeŋ, ii xa a soosoo luŋ meŋ, saradiŋ to. Woo xoo la, a xa mawuura dondiŋ Anabi Iburayima yeŋ, xa dondiŋ mawuura a la Yanxuuba fanaŋ yeŋ a niŋ Dawuda niŋ Esayi. Woo bee keliŋo xoo la, a xa dondiŋ mawuura a la Anabi Daniyeli fanaŋ yeŋ. Karaŋo niŋ to, nn ba a je la, Ala xa a mawuura ñaa meŋna la.

Niŋ meŋ xa mansa ke la juloo taa, kabiriŋ a ma a saraa, a mee tara firindiŋ. Tuma woo tuma, a bi i miira la, xo «Mansaŋ be naa la nte noo la ba?» Bari, na a baŋta saraa la doroŋ, xodi, a maŋ firiŋ? A firiŋta lee de! Awa. Ntelu bee kiliŋ kiliŋ xa Ala la juloo taa, nn xa a soosoo tumoo meŋ na. Kabiriŋ woo maŋ saraa, i mee tara noo firindiŋ. Xa tara, ite miya saraa noo! Ayi. Nte mu woo, ite mu woo, ntelu xa Ala soosoo ñaa meŋnu ma, ntelu mee woo sara noo muume! Baawoo, woo saraŋ te godoo ti, aŋ te bara ti, aŋ duŋ te kuw ñimmaa fanaŋ ti; woo saraa mu saayaa lee ti--jahanama taxoo. Niŋ nteleelu be woo saraa la, nn ba a saraa la kadawuŋ! Bari, Ala tantu, ate xoo, xo ate sa a saraa nn yeŋ nee. I be laaliŋ woo la ba?

Ala xa Anabi Esayi niŋ Anabi Yeremi bula meŋ safee la, woo keta. Ala xa fangoo dii Yahudiyaalu jaxoolu ma, fo ii si ii manoo, xi ii laduŋ joŋñaa to. Woo lee xa a ke, Ala xumata Anabi Daniyeli yeŋ tumoo meŋna, a tuŋ be Babiloni jamanoo xaŋ woo tumoo lee. Ii be jee, ii be jee. Yahudiyaa jamaa boyita Babiloni ala fuuliŋolu batu la, bari doolu xi i baŋ woo lee to. Karaŋo niŋ nee to, nn ba a je la, meŋ keta kee moxoo naani la, ii xi ii baŋ tumoo meŋ.

Yahudiyaalu xa Anabi Yeremi ñaagaa, baawoo Ala xa meŋ fo ii yeŋ ate bulu la, woo maŋ diiyaa ii yeŋ. Bari, moxoolu xa a ñaagaa ñaa woo ñaa, a tuuta a to, a mi i dee. Ala xa meŋ fo, a xa woo lasii a ñaa ma

Niŋ meŋ maŋ Anabi Esayi toxoo mee. Ala xa Anabi Esayi bula ñaa to kuwo doolu fo la sanjiy keme worowula ñoxoŋ Anabi Musaa tiloo xoo la. Woo xumoolu to, doolu daafaata Anabi Esayi faŋo tiloo; doolu daafaata ate tiloo xoo la; doolu maŋ daafaa foo sanjiy keme worowula ate tiloo xoo la; doolu haabii, ii maŋ daafaa. Bari, baawoo a la xuma foloolu daafaata, nn sa a loŋ nee, xo a too fanaŋ be daafaa la. Niŋ Ala kiitita a la doroŋ, a too fanaŋ be daafaa la lee. Sika sii ta a to.

I se taxa miŋ to Alaŋ te jaŋ meŋ? Woo dulaa be keliŋ ba? Ayi. Aŋ te keliŋ. Karaŋo niŋ nee to, nn ba a je la, Ala xa meŋ ke Anabi Yunusa xa toxee i baŋ na Ala la Yaamaroo ma tumoo meŋ na.

Ŋaneeyaa meŋ tuŋ be Isirayilagoolu bulu woo luŋ, woo ŋaneeyaa be ite lee bulu fanaŋ bii. I be joŋ batu la? Baawoo, haabii, Ala soobee be keliŋ, ala fuuliŋolu fanaŋnu be keliŋ nee mene. I be jumaŋ batu la?

Ala xoo Jabuura xono la, suura 50, xo «Ilu xa tantuloo ke ilu la saraxoo ti». Woo xoto mu muŋ ti? Ilaŋ nn be woo lee tofo la karaŋo niŋ nee to

I sa a tara, Jabuura be talaalin kayiti naani ti. Sigoo kayitoo be jee. Sandoo kayitoo jee. Kawandiloo kayitoo be jee a nin Sigoolu la sigoo kayitoo. Woo kayiti naanoo bee kafuliŋo mu Jabuura Kitaaboo lee ti. Awa. Ala xa Anabi Sulemani bula kayiti sabaa safee la jabuura xono la. Nn xa Sandoo kayitoo je dondin. Nn na karaŋo niŋ nee to, nn be dondiŋ je la Kawandiloo kayitoo xono la.

Ala xa Anabi Sulemani bula sandoo siyamaŋ nee safee la Jabuura xono la. Sandoo niŋnu, iiŋ te laafidoolu ti, bari toŋñaa lee mu ii bee ti. Toŋñaa meŋ mu, toŋñaa meŋ se ntelu deema kabiriŋ nn be duniyaa niŋ nee to.

Awa. Ala xa loŋo dii Anabi Sulemani yeŋ, ixo a xa Ala matara ñaa meŋ na. Xa tara, Ala xa a bula Sandoo Kitaaboo fanaŋ safee la, meŋ be tara la Jabuura xono la. Sandoolu niŋnu te laafidoolu ti, bari ii mu toŋñaa lee ti. Toŋñaa meŋ mu, toŋñaa meŋ se nn deema duniyaa niŋ nee tokutuŋ.

Luŋ doo keta, Ala xumata Sulemani yeŋ, xa a fo, xo a loxoo be feŋ feŋ na, xo na a xa a fo, xo a sa a dii a ma lee. I la miira to, Sulemani xa Ala jaabi ñaa dii? A loxoo be godoo la ba? A loxoo be siymayaa la ba? Niŋ Ala tuŋ xa woo fo ite lee yeŋ, ite sa a jaabi dii? Awa. Karaŋo niŋ nee to, i ba a mee la, Sulemani xa Ala jaabi ñaa meŋna la, a niŋ Ala xa meŋ ke a yeŋ.

Anabi Dawuda saagita, a diŋ ke, Sulemani sigita mansayaa la, xa Alabatusuubaa loo. Karaŋo niŋ nee to, nn be woo lee tofo la, xa nn yili bula subu saraxabo xoto la fanaŋ.

Anabi Dawuda la suura niŋ xono la, Ala xa a la gullo ba mawura nn yeŋ tuguŋ. Ilaŋ nn xa mee, Ala xa meŋ fo ate la feeroo ma, ate xa meŋ tege fo niŋ Haadamadiŋolu se kisi kiitoo ma ñaa meŋna la.