Daily interviews

ដើម្បីអបអរថ្ងៃបុណ្យចូលឆ្នាំថ្មី រដ្ឋបាលខេត្តបន្ទាយមានជ័យបានរៀបចំពិធីកម្សាន្តសប្បាយរយៈពេល ៣ថ្ងៃសម្រាប់ជនភៀសសឹកជិត ៣ ០០០គ្រួសារនៅជម្រកបណ្តោះអាសន្នស្ថិតក្នុងភូមិ និងឃុំស្លក្រាម នៃស្រុកស្វាយចេក។ នៅក្នុងកិច្ចសម្ភាសជាមួយវិទ្យុបារាំង RFI នាថ្ងៃទី១៥ ខែមេសា ឆ្នាំ២០២៦នេះ លោក លី សុវណ្ណារិទ្ធ អភិបាលរង និងជាអ្នកនាំពាក្យរដ្ឋបាលខេត្តបន្ទាយមានជ័យបាន​កត់សម្គាល់ថា ភាគច្រើននៃជនភៀសសឹកសប្បាយចិត្ត ដែលបានចូលរួមលេងល្បែងប្រជាប្រិយផ្សេងៗ។ តែអ្នកនាំពាក្យរូបនេះដដែលក៏បានមើលឃើញថា អាចមានអ្នកខ្លះ ដែលមិនបានចូលរួម មិនសូវសប្បាយចិត្តដែរ ដោយសារតែមានអារម្មណ៍ដិតដាមដោយការបាត់បង់ផ្ទះសម្បែង៕

សង្រ្គាមនៅមជ្ឈិមបូព៌ាបាន និងកំពុងជះផលវិបាកលើវិស័យជាច្រើននៅសឹងគ្រប់ប្រទេសក្នុងលោក។ ក្រៅពីវិស័យប្រេងឥន្ធនៈ និងឧស្ម័ន វិស័យទេសចរណ៍ក៏កំពុងរងផលប៉ះពាល់ខ្លាំងមួយដែរ។ នៅកម្ពុជា សេវាកម្មផ្សេងៗដែលបំរើឲ្យវិស័យទេសចរណ៍នៅមិនទាន់មានការតម្លើងថ្លៃនៅឡើយទេ។ ផ្ទុយទៅវិញ សេវាកម្មស្នាក់នៅមួយចំនួនក្នុងខេត្តសៀមរាបនៅតែបន្តបញ្ចុះតម្លៃ។ នៅក្នុងកិច្ចសម្ភាសជាមួយវិទ្យុបារាំង RFI នាថ្ងៃទី២ ខែមេសា ឆ្នាំ២០២៦នេះ លោក ធួន ស៊ីណាន ប្រធានសមាគមទេសចរណ៍អាស៊ីប៉ាស៊ីហ្វិកកម្ពុជាកត់សម្គាល់ថា ការរក្សាតម្លៃសេវាក្នុងវិស័យទេសចរណ៍ឲ្យនៅដដែល ពិសេសក្នុងខេត្ត សៀមរាបដោយសារតែចំនួនភ្ញៀវទេសចរបានធ្លាក់ចុះ៕

ក្រសួងពាណិជ្ជកម្មបានចេញផ្សាយតម្លៃលក់រាយប្រេងឥន្ធនៈនៅតាមស្ថានីយ៍ចាប់ពីថ្ងៃសុក្រ ទី២០ ខែមីនា ឆ្នាំ២០២៦។ ប្រេងសាំងធម្មតាតម្លៃ ៥៤០០រៀលក្នុងមួយលីត្រ និងប្រេងម៉ាស៊ូតតម្លៃ ៦ ៧០០រៀលក្នុងមួយលីត្រ។ នៅក្នុងបទសម្ភាសជាមួយវិទ្យុបារាំងអន្តរជាតិ RFI លោក ប៉ែន សុវិជាតិ រដ្ឋលេខាធិការ និងជាអ្នកនាំពាក្យក្រសួងពាណិជ្ជកម្មបានពន្យល់ថា រដ្ឋាភិបាលបានដាក់ចេញនូវវិធានការទម្លាក់ពន្ធគយ និងអាករបន្ថែមមក សូន្យដុល្លារ រួមទាំងទទួលបន្ទុកបង់ជំនួសពន្ធអាករលើតម្លៃបន្ថែមចំនួន ៦%។ បើតាមលោក ប៉ែន សុវិជាតិ អន្តរាគមន៍របស់រដ្ឋាភិបាលពេលនេះបានជួយទប់តម្លៃប្រេងនៅលើទីផ្សារក្នុងគោលដៅជួយសម្រាលជីវភាពរបសើពលរដ្ឋ។

នៅថ្ងៃទី១៩ ខែមីនានេះ ក្រុមការងារសហភាពសហព័ន្ធយុវជនកម្ពុជាបានរៀបចំពិធីសែនប្រុងពលីដើម្បីត្រៀមបើកដំណើរការតុបតែងលំអតាមដងផ្លូវ និងតំបន់សម្រាប់ត្រៀមព្រឹត្តិការណ៍ «នគរសង្ក្រាន្ត» នៅរាជធានីភ្នំពេញដែលនឹងឈានចូលមកដល់នៅជាង ២០ថ្ងៃទៀត។ នៅក្នុងបទសម្ភាសជាមួយវិទ្យុបារាំងអន្តរជាតិ RFI នារសៀលថ្ងៃទី១៩ ខែមីនានេះ លោក សោម រតនា ប្រធាននាយកដ្ឋានផ្សព្វផ្សាយ និងទំនាក់ទំនងសាធារណៈនៃគណៈកម្មាធិការសហភាពសហព័ន្ធយុវជនកម្ពុជាបានអះអាងថា ក្រុមការងាររៀបចំព្រឹត្តិការណ៍បាន​បែងចែកក្រុមការងារតាមផ្នែកនីមួយៗរួចហើយ តែដំណើរការរៀបចំតុបតែងលម្អនៅតាមតំបន់ដែលត្រូវរៀបចំព្រឹត្តិការណ៍នៅពុំទាន់មានលទ្ធផលធំដុំអ្វីនៅឡើយទេ។

គិតត្រឹមថ្ងៃទី១១ ខែមីនា ឆ្នាំ២០២៦ នេះ តម្លៃប្រេងឥន្ធនៈនៅកម្ពុជាបានហក់ឡើងកាន់តែខ្ពស់ ដោយសាំងធម្មតាមានតម្លៃ ៥ ២០០រៀល និងម៉ាស៊ូត ៦ ០៥០រៀលក្នុង ១លីត្រ។ នៅក្នុងកិច្ចសម្ភាសជាមួយវិទ្យុបារាំង RFI នាថ្ងៃទី១១ ខែមីនា ឆ្នាំ២០២៦ នេះ លោកឧកញ៉ា ស៊ិន ចន្ធី ប្រធានសមាគមភស្តុភារកម្មកម្ពុជាបានឲ្យដឹងថា ប្រេងម៉ាស៊ូតឡើងថ្លៃខ្ពស់នឹងប៉ះពាល់វិស័យដឹកជញ្ជូនធុនធ្ងន់ពី ២០ ទៅ ២៥ភាគរយ។ តែលោកឧកញ៉ាមិនភ្លេចបញ្ជាក់ថា ទោះតម្លៃប្រេងឡើងខ្លាំងកម្រិតនេះក៏នៅមិនទាន់អាចធ្វើឲ្យអាក់ខានដល់ការដឹងជញ្ជូនរបស់រថយន្តធុនធំបាននៅឡើយដែរ៕

កាលពីពេលថ្មីៗនេះ ស្ថានទូតអូស្ត្រាលីប្រចាំកម្ពុជា និងវិទ្យាស្ថានប៉ាស្ទ័រកម្ពុជាបានប្រកាសពង្រីកសេវាធ្វើតេស្តសុវត្ថិភាពចំណីអាហារ ដោយបំពាក់ឧបករណ៍ដែលមានសមត្ថភាពខ្ពស់អាចរកឃើញសំណល់ថ្នាំកសិកម្ម និងប្រកបដោយភាពជាក់លាក់។ នៅក្នុងកិច្ចសម្ភាសជាមួយវិទ្យុបារាំងអន្តរជាតិ RFI នាថ្ងៃទី១២ ខែកុម្ភៈ ឆ្នាំ២០២៦នេះ អ្នកឧកញ៉ា ហ៊ុន ឡាក់ អគ្គលេខាធិការសមាគមឧកញ៉ាកម្ពុជា និងជានាយកក្រុមហ៊ុន Tropicam បានថ្លែងថា វត្តមានឧបករណ៍ធ្វើតេស្តដ៏ទំនើបរកសារធាតុគីមីពិតជាមានអត្ថប្រយោជន៍ច្រើនសម្រាប់ប្រតិបត្តិករនាំចេញផលិតផលអាហារកម្ពុជា៕

កាលពីពេលថ្មីៗនេះ អង្គការសង់ត្រាល់បានដាក់ឲ្យដំណើរការនូវកម្មវិធីប្រព័ន្ធត្រួតពិនិត្យការងារឆបោកនៅលើបណ្តាញសង្គមតេឡេក្រាមរបស់ខ្លួន។ នៅក្នុងកិច្ចសម្ភាសជាមួយវិទ្យុបារាំងអន្តរជាតិ RFI នាថ្ងៃសុក្រ ទី៦ ខែកុម្ភៈ ឆ្នាំ២០២៦ លោក មឿន តុលា នាយកប្រតិបត្តិអង្គការសង់ត្រាល់បានឲ្យដឹងថា ប្រព័ន្ធត្រួតពិនិត្យការងារឆបោក ឬហៅជាភាសាអង់គ្លេស Job Scam Detector អាចវាយតម្លៃហានិភ័យការងារនៅកម្ពុជា ពិសេសជួយពលករខ្មែរដែលត្រឡប់ពីប្រទេសថៃកុំឲ្យធ្លាក់ក្នុងការងារឆបោកអនឡាញ។ តែលោក មឿន តុលា មិនភ្លេចបញ្ជាក់ថា Job Scam Detector មានតួនាទីត្រឹមជាអ្នកផ្តល់ព័ត៌មានប៉ុណ្ណោះ ពោលមិនអាចជាអ្នកសម្រេចចិត្តជំនួសពលរដ្ឋ ឬពលករដែលកំពុងស្វែងរកការងារធ្វើបានឡើយ។

ក្រោយពីបានឡើងថ្លៃកប់ពពក ១តម្លឹងជិត ៧ ០០០ដុល្លារកាលពីចុងខែមករា ឆ្នាំ២០២៦ មក មាសបានធ្លាក់ថ្លៃបន្តិចវិញនាដើមខែកុម្ភៈ ឆ្នាំ២០២៦នេះដោយមានតម្លៃប្រមាណ ៦ ០០០ដុល្លារក្នុង ១តម្លឹង។ នៅក្នុងបទសម្ភាសជាមួយវិទ្យុបារាំងអន្តរជាតិ RFI នាថ្ងៃទី៥ ខែកុម្ភៈ លោក ឡុង សំណាង ប្រធានផ្នែកប្រឹក្សាយោបល់ហិរញ្ញវត្ថុនៃក្រុមហ៊ុន PP Link Securities បានទទួលស្គាល់ថា ហាងឆេងមាសនាដើមឆ្នាំ២០២៦ នេះ មានការប្រែប្រួលខ្លាំងជាងពេលណាៗទាំងអស់។ តែសម្រាប់លោក ឡុង សំណាង ទោះបីជាមាសបានធ្លាក់ថ្លៃបន្តិចវិញក៏ដោយក៏មាសនៅតែជាទ្រព្យដែលសុវត្ថិភាពបំផុត ហើយតម្លៃរបស់វានឹងកើនឡើងនាពេលអនាគត។

នៅថ្ងៃទី៤ ខែកុម្ភៈ ឆ្នាំ២០២៦ លោក ប៉ាន់ខែម ប៊ុនថន រដ្ឋលេខាធិការទីស្តីការគណៈរដ្ឋមន្ត្រី និងជាប្រធានក្រុមការងាររដ្ឋាភិបាលប្រចាំក្រុងប៉ោយប៉ែត ខេត្តបន្ទាយមានជ័យ បានជួបប្រជុំជាមួយក្រុមពាណិជ្ជករ និងក្រុមអាជីវករក្រុងប៉ោយប៉ែត។ កម្មវត្ថុ គឺដើម្បីពិភាក្សាជុំវិញគម្រោងផែនការអភិវឌ្ឍក្រុងប៉ោយប៉ែត។ នៅក្នុងកិច្ចសម្ភាសជាមួយវិទ្យុបារាំងអន្តរជាតិ RFI នាថ្ងៃទី៤ ខែកុម្ភៈនេះ លោក ប៉ាន់ខែម ប៊ុនថន បានប្រាប់ឲ្យដឹងថា ស្ថានភាពរស់នៅ និងការរកស៊ីនៅក្រុងប៉ោយប៉ែតបានវិលត្រលប់មកភាពប្រក្រតីឡើងវិញហើយ។ តែលោកមិនភ្លេចបន្ថែមថា ពលរដ្ឋ និងអាជីវករនៅតែដក់ក្នុងអារម្មណ៍ចំពោះការបំពានរបស់ភាគីថៃមកលើតំបន់សេដ្ឋកិច្ចចម្រុះជាតិសាសន៍មួយនេះ។

នៅក្នុងខែមករា ដើមឆ្នាំ២០២៦ នេះ ការបង្ក្រាបសម្បុកឆបោក​អនឡាញ និងការចាប់ខ្លួនមេខ្លោងឧក្រិដ្ឋជន ចេន ហ្ស៊ី បញ្ជូនទៅចិនបានទទួលការចាប់អារម្មណ៍យ៉ាងខ្លាំងពីវិនិយោគិនក្នុងវិស័យអចលនទ្រព្យនៅកម្ពុជា។ នៅក្នុងកិច្ចសម្ភាសជាមួយវិទ្យុបារាំង RFI នាថ្ងៃទី២២ ខែមករា ឆ្នាំ​២០២៦នេះ ឧកញ៉ា សន សៀប ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជាមើលឃើញថា ការបង្ក្រាបបទល្មើសឆបោកអនឡាញ និងការចាប់ខ្លួនមេបណ្តាញឧក្រិដ្ឋជន ចេន ហ្ស៊ី បញ្ជូនទៅចិន គឺជាសញ្ញាដ៏វិជ្ជមានសម្រាប់វិស័យអចលនទ្រព្យកម្ពុជា។ លោក សន សៀប ប្រៀបប្រដូចការចាប់ខ្លួន ចេន ហ្ស៊ី និងការបំបែកសម្បុកឆបោកអនឡាញទៅនឹងការសម្អាតកករនៅក្នុងពាង៕

កាលពីថ្ងៃទី១៩ ខែមករា ឆ្នាំ២០២៦ ប្រមុខរដ្ឋាភិបាលកម្ពុជាបានសម្រេចជ្រើសយកថ្ងៃទី៦ ខែមិថុនា ឆ្នាំ២០២៧ ដើម្បីរៀបចំការបោះឆ្នោតជ្រើសរើសក្រុមប្រឹក្សាឃុំ សង្កាត់អាណត្តិទី៦។ នៅក្នុងកិច្ចសម្ភាសជាមួយវិទ្យុបារាំងអន្តរជាតិ RFI នាថ្ងៃទី២១ ខែមករា ឆ្នាំ២០២៦នេះ លោក ហង្ស ពុទ្ធា អ្នកនាំពាក្យគណៈកម្មាធិការជាតិរៀបចំការបោះឆ្នោត(គ.ជ.ប) បានថ្លែងថា គ.ជ.ប បានត្រៀមខ្លួនអនុវត្តការងារតាមសេចក្តីសម្រេចរបស់នាយករដ្ឋមន្រ្តី តែក៏បានត្រៀមផែនការ «ខ» មួយទៀត ក្នុងករណីមានបញ្ហាណាមួយកើតឡើងជាយថាហេតុ។ ក្នុងន័យនេះ បញ្ហាជាយថាហេតុ ដែលអាចបណ្តាលមកពីការអូសបន្លាយនៃជម្លោះព្រំដែនកម្ពុជា-ថៃ៕

សៀវភៅ «ភ្នំមួយមិនអាចមានខ្លាពីរ» នឹងសម្ពោធជា​ទម្រង់​ភាសាខ្មែរ​ ​នៅថ្ងៃអាទិត្យទី១៨មករាខាងមុខ។ សរសេរដោយលោក Gordon Conochie​ ដែលជា​ជនជាតិអូស្ត្រាលី សៀវភៅ «ភ្នំមួយមិនអាចមានខ្លាពីរ» ឬ​ «A Tiger Rules the Mountain» បានរំលេចពីទិដ្ឋភាពនយោបាយនៅស្រុកខ្មែរក្នុងរយៈពេល ១០ឆ្នាំចុងក្រោយ រាប់ចាប់តាំងពីឆ្នាំ២០១៣។ នៅក្នុងបទសម្ភាសន៍ជាមួយវិទ្យុបារាំងអន្តរជាតិ Rfi នាថ្ងៃព្រហស្បតិ៍ទី១៥ ខែមករានេះ លោក ម៉ៃ ទិត្យថារ៉ា ដែលបានចូលរួម​ប្រែសម្រួលសៀវភៅ ​«ភ្នំមួយមិនអាចមានខ្លាពីរ» ​ជាភាសាខ្មែរ​ឲ្យដឹងថា សៀវភៅនេះ​បានបង្ហាញពី​​តថភាពនយោបាយស្រុកខ្មែរ នៅពេលបក្សប្រឆាំងមួយមានសំឡេងគាំទ្រប្រកៀកប្រកិតទៅនឹងបក្សកាន់អំណាច។ ចំពោះ​​លោក ម៉ៃ ទិត្យថារ៉ា អ្នកនយោបាយខ្មែរគ្រប់និន្នាការគួរតែអានសៀវភៅ«ភ្នំមួយមិនអាចមានខ្លាពីរ»។

សង្គ្រាមព្រំដែនរវាងកម្ពុជា និងថៃអស់រយៈពេល ២១ថ្ងៃកាលពីខែធ្នូ ឆ្នាំ២០២៥ បានបន្សល់ទុកគ្រាប់ និងយុទ្ធភណ្ឌមិនទាន់ផ្ទុះជាច្រើនក្នុងទឹកដីកម្ពុជា ពិសេសនៅតាមបណ្តាខេត្តជាប់ព្រំដែន។ នៅក្នុងកិច្ចសម្ភាសន៍ជាមួយវិទ្យុបារាំងអន្តរជាតិ RFI នាថ្ងៃទី១៤ ខែមករា ឆ្នាំ២០២៦នេះ លោកទេសរដ្ឋមន្ត្រី លី ធុជ អនុប្រធានទី១ នៃអាជ្ញាធរមីនបានថ្លែងថា អាជ្ញាធរមីន រួមនឹងស្ថាប័នពាក់ព័ន្ធបានចាប់ផ្តើមផ្សព្វផ្សាយអប់រំដល់ប្រជាពលរដ្ឋនៅតាមជំរំជនភៀសសឹក ការដាក់សញ្ញាសម្គាល់យុទ្ធភណ្ឌមិនទាន់ផ្ទុះ និងការវាយតម្លៃលើទីតាំងគ្រាប់មិនទាន់ផ្ទុះ។ លោក លី ធុជ សន្និដ្ឋានថា ការផ្សព្វផ្សាយរបស់អាជ្ញាធរពីគ្រោះថ្នាក់ដោយសារយុទ្ធភណ្ឌមិនទាន់ផ្ទុះមានប្រសិទ្ធភាព និងថា គ្មានពលរដ្ឋណាម្នាក់បានរងគ្រោះនៅឡើយទេ៕

រដ្ឋាភិបាលកម្ពុជាបានសម្រេចបង្កើតក្រុមការងារចំពោះកិច្ចរៀបចំ និងគ្រប់គ្រងការស្តារជីវភាព និងហេដ្ឋារចនាសម្ព័ន្ធ ដែលខូចខាតដោយសារការវាយប្រហាររបស់កងទ័ពថៃនៅក្នុងជម្លោះព្រំដែនកម្ពុជា-ថៃ។ ក្រុមការងារនេះ មានសមាសភាពចម្រុះចំនួន ២៥រូប ក្នុងនោះក៏មានអភិបាលខេត្តជាប់ព្រំដែនទាំង៧ ជាសមាជិក។ នៅក្នុងកិច្ចសម្ភាសជាមួយវិទ្យុបារាំង RFI នាថ្ងៃទី៣១ ខែធ្នូ ឆ្នាំ២០២៥នេះ លោក ចន ណារិទ្ធ រដ្ឋលេខាធិការក្រសួងសេដ្ឋកិច្ច និងជាប្រធានក្រុមការងារចំពោះកិច្ចរៀបចំ និងគ្រប់គ្រងការស្តារជីវភាព និងហេដ្ឋារចនាសម្ព័ន្ធ ដែលខូចខាតនៅក្នុងជម្លោះព្រំដែនកម្ពុជា-ថៃ បានបញ្ជាក់ថា ការងារអាទិភាពរបស់ក្រុមការងារនេះ គឺវាយតម្លៃពីផលប៉ះពាល់ទៅលើហេដ្ឋារចនាសម្ព័ន្ធឯកជន និងហេដ្ឋារចនាសម្ព័ន្ធសាធារណៈ ដែលបម្រើឲ្យជីវភាពរស់នៅរបស់ពលរដ្ឋ៕

អស់រយៈពេលជាង ២សប្តាហ៍ហើយ ដែលថៃបានបើកការវាយប្រហារមកលើប្រទេសកម្ពុជា នៅតាមបណ្តោយព្រំដែនកម្ពុជា-ថៃ។ ​ការវាយប្រហារនេះបង្កឲ្យកងទ័ព និងជនស៊ីវិលបាត់បង់ជីវិត​ និងរងរបួស ផ្ទះសម្បែង និងហេដ្ឋារចនាសម្ព័ន្ធត្រូវបានបំផ្លាញ រួមនឹងជំរុញឲ្យមានជនភៀសសឹកយ៉ាងច្រើនសន្ធឹកសន្ធាប់។ នៅក្នុងកិច្ចសម្ភាសជាមួយវិទ្យុបារាំង RFI នាថ្ងៃទី២៤ ខែធ្នូ ឆ្នាំ២០២៥នេះ លោក គឹម រតនា នាយកប្រតិបត្តិអង្គការការីតាសកម្ពុជា (Caritas Cambodia) បានថ្លែងថា អង្គការរបស់លោក កំពុងផ្តល់ជំនួយបន្ទាន់ដល់ជនភៀសសឹកនៅតាមបណ្តាខេត្តចំនួន៧ រួមមានស្បៀង ជំរកបណ្តោះអាសន្ន សម្ភារៈប្រើប្រាស់ ទឹកស្អាត ​និងផ្តល់ការសិក្សាបណ្តោះអាសន្នដល់កុមារផងដែរ។​ នាយកអង្គការមនុស្សធម៌កាតូលិកមួយនេះ បានហៅព្រឹត្តិការណ៍ផ្ទុះអាវុធនេះថា ជាសង្គ្រាមឈ្លានពានរបស់ថៃមកលើកម្ពុជា។

គម្រោង​សវនាការ​សំណុំ​រឿង​ លោក កឹម សុខា ​អតីត​ប្រធាន​អតីត​គណ​បក្ស​សង្គ្រោះ​ជាតិ​ នា​ថ្ងៃ​ទី​១៨​ ខែ​ធ្នូ​ឆ្នាំ​២០២៥​នេះ​ ត្រូវ​បាន​លើក​ពេល​ ដោយ​មិន​កំណត់​។​ កញ្ញា កឹម មនោវិទ្យា កូនស្រី​របស់​លោក កឹម សុខា បានទទូច​ជាថ្មី​ឲ្យ​តុលា​ការ​ពន្លឿន​បញ្ចប់​សំណុំ​រឿង​និង​ទម្លាក់​ចោល​​បទ​ចោទ​ប្រកាន់​លើ​ឪពុក​ គឺ​​លោក​ កឹម សុខា ពី​បទ​ «ក្បត់ជាតិ»​។ ​កញ្ញា កឹម ​មនោវិទ្យា ​ជឿ​ជាក់​ថា​ ប្រសិន​បើ​លោក ​កឹម សុខា ​មាន​សេរី​ភាព ​​លោក​អាចជួយ​កម្ពុជា ​ក្នុង​ការ​តស៊ូ​មតិ​ផ្នែក​ការ​ទូត​ ដើម្បី​ឲ្យ​អន្តរ​ជាតិ​ជួយ​បញ្ឈប់​ការ​ឈ្លានពាន​របស់​ថៃ​មក​លើ​កម្ពុជា​៕

ក្រសួងទេសចរណ៍កម្ពុជា និងឡាវបានឯកភាពគ្នាជំរុញការផ្សព្វផ្សាយទីផ្សារទេសចរណ៍រួមគ្នាតាមរយៈយុទ្ធនាការ «ប្រទេសពីរ គោលដៅតែមួយ»។ អ្នកជំនាញផ្នែកទេសចរណ៍មើលឃើញថា កម្ពុជាកំពុងងាករកច្រកយុទ្ធសាស្ត្រផ្សេងទៀតក្រៅពីថៃ ដើម្បីពង្រឹងវិស័យទេសចរណ៍ក្នុងអំឡុងពេលដែលខ្លួនកំពុងមានជម្លោះព្រំដែនជាមួយថៃ។ នៅក្នុងកិច្ចសម្ភាសជាមួយវិទ្យុបារាំង RFI នាថ្ងៃទី១៧ ខែធ្នូ ឆ្នាំ២០២៥នេះ លោកស្រី ឆាយ ស៊ីវលីន ប្រធានសមាគមទេសចរណ៍កម្ពុជាបានថ្លែងថា ការពង្រឹងវិស័យទេសចរណ៍ជាមួយឡាវ និងវៀតណាម គឺជាយុទ្ធសាស្ត្រ​បត់បែនទៅតាមកាលៈទេសៈ ខណៈយុទ្ធនាការផ្សព្វផ្សាយទេសចរណ៍រួមគ្នាជាមួយថៃត្រូវបានផ្អាក៕

នៅថ្ងៃទី១០ ខែធ្នូ ឆ្នាំ២០២៥នេះ ប្រទេសកម្ពុជាបានសម្រេចដកខ្លួនជាផ្លូវការពីការប្រកួតកីឡាស៊ីហ្គេម លើកទី៣៣ នៅប្រទេសថៃ ក្រោយសាច់ញាតិរបស់កីឡាករ កីឡាការិនីសម្តែងនូវការព្រួយបារម្ភពីសុវត្ថិភាព។ ជាការព្រួយបារម្ភ ខណៈកម្ពុជា និងថៃកំពុងប្រយុទ្ធគ្នា ដោយប្រដាប់អាវុធនៅតាមព្រំដែននៃប្រទេសទាំងពីរ។ នៅក្នុងកិច្ចសម្ភាសជាមួយវិទ្យុបារាំង RFI នាថ្ងៃទី១០ ខែធ្នូ ឆ្នាំ២០២៥នេះ ពីទីក្រុងបាងកកប្រទេសថៃ លោក វ៉ាត់ ចំរើន រដ្ឋលេខាធិការក្រសួងអប់រំ និងជាប្រធានប្រតិភូកីឡាកម្ពុជាបានបញ្ជាក់ថា ក្រៅពីហេតុផលសុវត្ថិភាព អត្តពលិកកម្ពុជាមិនបានរងនូវការគម្រាមកំហែងអ្វីផ្សេងទៀតទេ ខណៈកម្ពុជាបានបំពេញកាតព្វកិច្ចការទូតកីឡា តាមរយៈការចូលរួមកិច្ចប្រជុំនានា និងពិធីបើកកីឡាស៊ីហ្គេមលើកទី៣៣៕

កាលពីថ្ងៃទី២ ខែធ្នូ ឆ្នាំ២០២៥ រដ្ឋាភិបាលកម្ពុជា បានឯកភាពជាគោលការណ៍ ផ្តល់ការលើកលែងទិដ្ឋាការសាកល្បងចំពោះពលរដ្ឋចិន ដែលធ្វើដំណើរចេញពីប្រទេសចិន ដោយផ្តល់រយៈពេលស្នាក់នៅកម្ពុជាចំនួន ១៤ថ្ងៃ។ គម្រោងសាកល្បងមានរយៈពេល៤ខែ គិតចាប់ពីថ្ងៃទី១៥ ខែមិថុនា ដល់ថ្ងៃទី១៥ ខែតុលាឆ្នាំ២០២៦ ដោយនៅក្នុងនោះ ជនជាតិចិនគ្រាន់តែបំពេញ E-Arrival Card។ នៅក្នុងកិច្ចសម្ភាសជាមួយវិទ្យុបារាំង RFI នៅថ្ងៃទី៣ ខែធ្នូ ឆ្នាំ២០២៥នេះ លោក ធួន ស៊ីណាន ប្រធានសមាគមទេសចរណ៍អាស៊ីប៉ាស៊ីហ្វិកបានចាត់ទុកថា គម្រោងសាកល្បង លើកលែងទិដ្ឋាការចំពោះអ្នកទេសចរចិន គឺជាកាដូដ៏ធំ ដែលរដ្ឋាភិបាលផ្តល់ដល់វិស័យទេសចរណ៍។ ប៉ុន្តែ ដើម្បីសម្រេចគោលដៅនេះ លោក ធួន ស៊ីណាន បញ្ជាក់ដែរថា រដ្ឋាភិបាល និងអ្នកពាក់ព័ន្ធត្រូវរួមគ្នាដោះស្រាយបញ្ហាចម្បង ២ចំណុច គឺបំបាត់អំពើឆបោកតាមអនឡាញ និងបង្កើនការផ្សព្វផ្សាយពីគោលដៅទេសចរណ៍សុវត្ថិភាព៕

តុលាការវៀតណាម នៅថ្ងៃទី១៨វិច្ឆិកា បានកាត់ទោសពលរដ្ឋ និងព្រះសង្ឃ ៣អង្គ/នាក់ដាក់ពន្ធនាគារម្នាក់ៗចំនួន៣ឆ្នាំ​កន្លះ​​​។ ការសម្រេចនេះបានរងស្រោចដោយប្រតិកម្ម និងការថ្កោលទោសពីសំណាក់សមាគមខ្មែរកម្ពុជាក្រោម រួមទាំងសហគមន៍អន្តរជាតិមួយចំនួន​។ នៅក្នុងបទសម្ភាសជាមួយវិទ្យុបារាំងអន្តរជាតិ នាថ្ងៃព្រហស្បតិ៍ទី២៧ ខែវិច្ឆិកានេះ លោក សឺន យឿង ប្រធានសមាគមខ្មែរកម្ពុជាក្រោមដើម្បីសិទ្ធិមនុស្ស និងអភិវឌ្ឍន៍ បានឲ្យដឹងថា ពលរដ្ឋខ្មែរក្រោមនៅតែបន្តរងការធ្វើទុក្ខបុកម្នេញពីសំណាក់អាជ្ញាធរវៀតណាមតាមផ្លូវច្បាប់។ បន្ថែមពីនេះ លោក សឺន យឿង បានស្នើឲ្យរដ្ឋាភិបាលវៀតណាម បើកការស៊ើបអង្កេតដោយឯករាជ្យ ចំពោះករណីស្លាកស្នាមលើផ្ទៃមុខពលរដ្ឋខ្មែរក្រោមមួយរូប ដែលស្តែងឱ្យឃើញ​នា​​គ្រាដែលអាជ្ញាធរវៀតណាម​នាំទៅ​កាត់ទោសកាលពីថ្ងៃទី១៨ខែវិច្ឆិកា​។